PTI کی پارلیمانی پارٹی کا اجلاس کل منعقد ہوگا، بیرسٹرعلی ظفر

لاہور (این این آئی) پاکستان تحریک انصاف کے سینئر رہنما بیرسٹر علی ظفر نے کہا ہے کہ بانی پاکستان تحریک انصاف نے حکومت کے ساتھ مذاکرات جاری رکھنے کی ہدایت کی ہے، پی ٹی آئی نئے انتظامی یونٹس کے قیام کی بھی حامی ہے،پی ٹی آئی حکومت کے ساتھ مذاکرات کے لیے تیار ہے، ہم نے ممکنہ 28 ویں آئینی ترمیم کو مسترد کیا ہے نہ ہی قبول کیا ہے،ہمارا واضح ہے کہ صوبوں کا قیام انتظامی بنیادوں پر ہونا چاہیے، حکومت کے ساتھ مذاکرات کا مقصد صرف بانی کی رہائی نہیں بلکہ آئین و قانون کی بالادستی اور انصاف کا حصول ہے۔ایک انٹر ویو میں انہوںنے کہا کہ بانی کی کی ہدایات واضح ہیں کہ اصولوں پر سمجھوتا کیے بغیر بات چیت اور سیاسی معاملات کو آگے بڑھایا جائے،عمران خان کا وژن اور سیاسی موقف وہی ہے جو وزیراعظم بننے کے وقت تھا۔انہوںنے کہا کہ28 ویں آئینی ترمیم اور نئے صوبوں کے قیام سے متعلق ابھی تک مجوزہ آئینی تفصیلات سامنے نہیں آئی ہیں اس لیے اس پر حتمی رائے دینا قبل از وقت ہوگا۔اگر حکومت آئین کے موجودہ طریقہ کار کے تحت نئے صوبے بنانا چاہتی ہے تو اس کے لیے متعلقہ صوبائی اسمبلیوں کی دو تہائی اکثریت کے ساتھ قومی اسمبلی اور سینیٹ کی منظوری بھی درکار ہوگی۔تاہم اگر حکومت نئے صوبوں کے قیام کا طریقہ کار تبدیل کرنا چاہتی ہے تو آئین میں متعدد ترامیم کرنا پڑیں گی جو آئین میں بڑی سرجری ہو گی۔انہوں نے کہا کہ پی ٹی آئی نے 28ویں آئینی ترمیم کو مکمل طور پر مسترد کیا ہے اور نہ ہی قبول کیا ہے، جب مجوزہ ترمیم کی تفصیلات سامنے آئیں گی تو پارٹی ان کا جائزہ لے گی اور اگر اصولوں کے مطابق بات آگے بڑھانے کی گنجائش ہوئی تو مذاکرات بھی کیے جا سکتے ہیں۔عمران خان سے ملاقات میں اس معاملے پر عمومی گفتگو ضرور ہوئی تھی تاہم کسی حتمی فیصلے یا مذاکراتی حکمت عملی کو ابھی حتمی شکل نہیں دی گئی۔پی ٹی آئی کے تنظیمی ڈھانچے اور عمران خان کی جانب سے پارٹی رہنماں کو نئی ذمہ داریاں دینے کے حوالے سے بیرسٹر علی ظفر نے بتایا کہ ملاقات میں انہیں بھی بعض ذمہ داریاں سونپی گئی ہیں تاہم یہ کہنا درست نہیں ہوگا کہ پارٹی میں فوری طور پر کوئی بڑی تنظیمی تبدیلی کی گئی ہے۔پی ٹی آئی کی پارلیمانی پارٹی کا اجلاس پیر کو منعقد ہوگا، جس میں عمران خان کی ہدایات اور سیاسی و پارلیمانی حکمت عملی پر تفصیلی غور کیا جائے گا۔اجلاس کے بعد پارٹی کے آئندہ اقدامات اور فیصلوں کے بارے میں مزید تفصیلات سامنے آئیں گی۔عمران خان کی حالیہ ملاقات میں پارٹی کے قانونی، سیاسی اور تنظیمی معاملات پر اہم رہنمائی حاصل ہوئی ہے، تاہم آئندہ سیاسی حکمت عملی اور فیصلوں کی حتمی شکل پی ٹی آئی کی پارلیمانی پارٹی کے اجلاس میں طے کی جائے گی۔