ظالموں کو ظلم سے روکتے حق بات کی طرف کھینچ کر لاتے رہو رائے ونڈ اجتماع سے علماء کا خطاب

رائے ونڈ(نیوز ایجنسیاں)عالمی اجتماع کی مختلف نشستوں سے خطاب کرتے ہوئے مولاناعبدالرحمان،بھائی فاروق،مولانا ظہیر الحسن،مولانا ابراہیم دیولہ ودیگر نے کہا کہ اجتماع اس پیغام کو سمجھنے اور سمجھانے کی تربیت گاہ ہے،یہاں کسی کا کوئی فرقہ نہیں،کوئی تنقید نہیں کی جاتی،صرف اللہ اور اس کے رسول ۖ کی بات کی جاتی ہے کہ یہ دنیا موت کی تیاری کی جگہ ہے،انسان جو کچھ بھی کرے صرف یہ سوچ ذہن میں رکھ لے کہ وہ آخرت کی تیاری کررہا ہے تو انسان کے سارے مسائل اللہ خود بخود ہی ختم کردے گا، حضو راقدس ۖ نے قسم کھا کر فرمایا کہ تم امت مسلماں امر بالمعروف اورنہی عن المنکر کرتے رہو،قبر میں جب منکر نکیر سوال کریں گے تو کیا جواب دیں گے ،تبلیغی اجتماع میں منکر نکیر کے سوالوں کا جواب دینے کی تعلیم پر ہی سارا دارومدار ہے، یہ دنیا فانی ہے اور یہ چند دنوں کی ہے آخرت کی زندگی ہمیشہ ہمیشہ کے لیے ہے، ظالموں کو ظلم سے روکتے رہو اور حق بات کی طرف کھینچ کرلاتے رہو، تمہارے قلوب بھی اسی طرح غلط کردیئے جائیں گے جس طرح ان ظالموں کے کردیئے گئے ہیں،تم بہترین امت ہو، لوگوں کے نفع رسانی کے لیے نکالے گئے ہو،تم لوگ نیک کام کا حکم کرتے رہو اور برے کاموں سے روکتے رہواوراللہ تعالی پر ایمان رکھتے رہو،،مسلمان بھائیوزندگی فانی ہے، اس پر ایک سیکنڈکا بھی بھروسہ نہیں ہے، دین سیکھنے میں پہل کرنے والوں کے لیے اللہ تعالی نے جنت کی بشارت دی ہے،شہر، قصبوں، گائوں گائوں اور گلی،محلوں میں پھیل جا ئواور چھوٹوں سے لے کر بڑوں تک دین سیکھنے اور سکھانے کی دعوت دے کران کو دین پھیلانے سکھانے کے عمل میں شامل کرکے اللہ تعالی کے دربار میں بلند ی کے مراتب حاصل کرنے والے بن جائو،سالانہ اجتماع میں واپس لوٹنے پر ان کو اپنی اور اپنے مسلمان بھائیوں کی طرف سے مبارک باد پیش کرتے ہیں،وہ لوگ قابل احترام ہیں جوا للہ تعالی کے حکم کو گلی محلوں دور دراز کے علاقوں میں مشکلات سے گزر کر پہنچاتے ہیں،کاروبار ،مال اوراہل وعیال کو چھوڑ کر دینی فریضہ انجام دینے والے اللہ تعالی کے دربار میں بلند درجات پائیں گے، مسلمانوں آئو سب مل کر عہد کریں کہ اس نیک مشن کو پورا کرنے کے لیے خود کو دعوت وتبلیغ کیلئے پیش کریں تاکہ کل رب العزت کے دربار میں یہ کہہ سکیں کہ میں نے ساری زندگی گناہ اور غفلت میں گزاردی لیکن تیری راہ پر تیرے مقرب حضرات کی تقلید کرتے ہوئے میں نے بھی دین سیکھنے اور سکھانے کی کوشش کی تھی ،دنیا سے منہ موڑ کر خالص تیری رضا کے لیے وقت صرف کیا تھا۔علما ئے اکرام نے مزید کہا کہ دعوت وتبلیغ کا کام عام کام نہیں ہے ،یہ کام انبیا ئے اکرام کی میراث ہے جنہوں نے اللہ تعالی کی واحدانیت کو عام کیا اس کام پر انہیں مختلف اذیتوں اور مشکلات کا سامنا کرنا پڑا،اس عظیم کام کی اہمیت کو سمجھتے ہوئے تمام کلمہ گو مسلمانوں کو اپنے اہل و عیا ل،محلے،شہر کے مکینوں کو دعوت دینا ہوگی۔عالمی اجتما ع میں 150سے زائد ممالک کے مندوبین نے شرکت کی،کراچی اور لاہور ائیر پورٹ پر مہمانوں کے استقبال کیلئے کارکنان موجود رہے،حلقہ بیرون میں تمام غیر ملکی مہمانوں کوٹھہرایا گیا جہاں ان کی تواضع مختلف انواع واقسام کے کھانوں سے کی گئی، عالمی اجتماع میں شرکا ء کی تعداد 4لاکھ سے تجاوز کرگئی۔رائے ونڈ میں جاری عالمی اجتماع آج(اتوار)دعا کے بعد اختتام پذیر ہو جائے گا،اختتامی دعا سے قبل مولاناعبیدا للہ خورشیدکارکنان کو خصوصی ہدایات دیں گے جبکہ اختتامی دعا مولانا ابراہیم دیولہ آف انڈیا کروائیں گے،دعا کے بعد شرکا ء اپنے علاقوں کو روانہ ہوجائیں گے۔
علماء کرام