یورپی یونین کا اسرائیل کیساتھ تجارتی معاہدہ معطل کرنیکی درخواست پر غور شروع

برسلز (این این آئی) یورپی یونین نے انسانی حقوق اور بین الاقوامی قوانین کی مسلسل خلاف ورزیوں کے پیش نظر اسرائیل کے ساتھ دوطرفہ تجارتی اور سیاسی شراکت داری کے معاہدے کو مکمل طور پر معطل کرنے سے متعلق عوامی درخواست کا باضابطہ جائزہ لینے کا فیصلہ کر لیا۔ یورپی کمیشن کے جاری کردہ اعلامیے کے مطابق یورپی شہریوں کی جانب سے چلائی جانے والی اس مہم کے حق میں مجموعی طور پر گیارہ لاکھ سترہ ہزار سے زائد تصدیق شدہ دستخط جمع ہوئے ہیں اور یورپ کے بارہ رکن ممالک میں اس نے قانونی شرائط پوری کر لی ہیں۔ یورپی کمیشن کے حکام نے بتایا کہ یورپی قوانین کے تحت جب کوئی عوامی مہم مطلوبہ دستخطوں کی تعداد پوری کر لیتی ہے تو کمیشن پر لازم ہوتا ہے کہ وہ اس مطالبے کا باضابطہ جائزہ لے کر اپنا ردعمل پیش کرے۔ انسانی حقوق کی تنظیموں کا کہنا تھا کہ یہ پیش رفت یورپی عوام کے بڑھتے ہوئے دبائو کا نتیجہ ہے، تاہم معاہدے کی حتمی معطلی کا فیصلہ یورپی یونین کے رکن ممالک کی باہمی مشاورت کے بعد کیا جائے گا۔