چینی شہریوں کی گاڑی پر حملے کا مقدمہ، ملزم داد بخش کو 48 سال قید کی سزا

کراچی (این این آئی) انسداد دہشت گردی کی خصوصی عدالت نے کراچی میں چینی شہریوں کی گاڑی پر فائرنگ اور انہیں زخمی کرنے کے مقدمے کا فیصلہ سناتے ہوئے کالعدم تنظیم بلوچستان لبریشن آرمی (بی ایل اے) سے تعلق کے الزام میں گرفتار ملزم داد بخش کو مجموعی طور پر 48 سال قید کی سزا سنا دی۔ عدالت نے ملزم پر 13 لاکھ 50 ہزار روپے جرمانہ بھی عائد کر دیا۔ کراچی سنٹرل جیل میں قائم انسداد دہشت گردی کمپلیکس کی خصوصی عدالت نمبر 4 کے جج امین الدین خاصخیلی نے مقدمے کی سماعت کے بعد فیصلہ سنایا۔ استغاثہ کے مطابق ملزم داد بخش اور اس کے ساتھیوں نے کراچی کے علاقے گل بائی میں چینی باشندوں کی گاڑی کو نشانہ بناتے ہوئے فائرنگ کی تھی جس کے نتیجے میں دو چینی شہری زخمی ہوگئے تھے۔ عدالتی فیصلے کے مطابق اسی مقدمے میں نامزد ناصر علی، شہزاد بلوچ اور ڈاکٹر خلیل بلوچ کو مفرور قرار دیا گیا ہے۔ استغاثہ کی جانب سے یہ بھی مؤقف اختیار کیا گیا کہ سزا یافتہ ملزم یونیورسٹی بم دھماکے میں بھی ملوث رہا ہے۔ واضح رہے کہ چینی شہریوں پر حملے کا مقدمہ کاؤنٹر ٹیررازم ڈیپارٹمنٹ (سی ٹی ڈی) نے درج کیا تھا۔ عدالت کے فیصلے کے بعد مقدمے میں سزا پانے والے ملزم کو 48 سال قید اور جرمانے کی سزا کا سامنا کرنا ہوگا۔