پنک بال اور شبنم وکٹیں لینے کیلئے رکاوٹ بن گئی

دوبئی(سپورٹس ڈیسک )فاسٹ بولر وہاب ریاض کا کہنا ہے کہ پنک بال اور شبنم کی وجہ سے وکٹیں لینا مشکل ہے مگر ویسٹ انڈیز کی ٹیم کو جلد آﺅٹ کرنے کی کوشش کریں گے۔پاکستان کرکٹ ٹیم کے فاسٹ بولر وہاب ریاض کا کہنا ہے کہ گلابی گیند سے بولنگ کرنا ایک مختلف تجربہ ہے اور یہ آسان نہیں ہے۔ ان کا کہنا تھا کہا کہ گلابی گیند سے بولنگ کرتے ہوئے خاص طور پر رات کے وقت بہت مشکل ہو رہی ہے کیونکہ اوس کی وجہ سے گیند گیلی ہو کر نرم پڑجاتی ہے۔وہ کہتے ہیں کہ اس صورتحال میں گیند سے نہ تو روایتی سوئنگ ہو رہی ہے اور نہ ہی ریورس سوئنگ۔وہاب نے میچ کے تیسرے دن اپنی شاٹ پچ گیندوں سے ویسٹ انڈین بلے بازوں کو خاصا پریشان کیا اور ٹیم کے لیے دو وکٹیں بھی لیں۔ان کا کہنا تھا کہ ایک سینیئر بولر کی حیثیت سے انھیں اس بات کا احساس رہتا ہے کہ انھیں اچھی پرفارمنس دینی ہے اور لوگوں کی توقعات بھی بہت زیادہ ہوتی ہیں۔انھوں نے کہا کہ موجودہ پیس اٹیک کو جس میں ان کے علاوہ سہیل خان اور محمد عامر شامل ہیں ڈومیسٹک کرکٹ کا اچھا خاصا تجربہ ہے اور وہ سمجھتے ہیں کہ جب کسی بولر کو کامیابی حاصل نہ ہو تو وہ اپنے ساتھی بولر کی حوصلہ افزائی کرتے ہوئے اسے کوئی نہ کوئی کارآمد مشورہ ضرور دے۔ان کے خیال میں یہ اسی سوچ کا نتیجہ ہے کہ وہ ہمیشہ محمد عامر کے ساتھ فیلڈ میں گفتگو کرتے رہتے ہیں اور انھیں کوئی نہ کوئی مشورہ ضرور دیتے رہتے ہیں جو ان کے کام آسکے۔وہاب ریاض کا کہنا ہے کہ کرکٹر کے لیے ہر دن اچھا نہیں ہوتا کبھی قسمت آپ کا ساتھ دیتی ہے اور کبھی نہیں، لیکن ایک پروفیشنل کرکٹر کی حیثیت سے انھیں یہ بات ہمیشہ یاد رکھنی ہے کہ ہمت نہیں ہارنی ہے۔پاکستانی فاسٹ بولر وہاب رہاض نے بولنگ کے دوران ڈینجر زون میں آنے کی اپنی عادت کے بارے میں کہا کہ یہ نفسیاتی طور پر آپ پر اثر انداز ضرور ہوتی ہے۔وہ جب کریز کا استعمال کرتے ہیں تو ان کا پیر ڈینجر ایریا میں پڑجاتا ہے لیکن وہ اس صورتحال سے پریشان نہیں ہیں۔وہاب ریاض نے البتہ یہ تسلیم کیا کہ یہ بات ضرور ان کے لیے پریشان کن ہے کہ وہ وکٹ لے لیتے ہیں لیکن وہ گیند نو بال ہوجاتی ہے اس خامی کو دور کرنے کے لیے وہ محنت کررہے ہیں اور انھیں امید ہے کہ وکٹ لینے والی گیند نو بال نہ ہو۔