لاہور( این این آئی )لاہور ہائیکورٹ کے حکم پر حلقہ این اے131کے ووٹوں کی دوبارہ گنتی کا عمل شروع کر دیا گیا ،حلقہ این اے 131سے مسلم لیگ (ن) کےامیدوار خواجہ سعد رفیق نے تحریک انصاف کے چیئرمین عمران خان کی کامیابی کو چیلنج کرتے ہوئے دوبارہ گنتی کی درخواست دی تھی ۔ دوبارہ گنتی کا عمل سیشن کورٹ میں ریٹرننگ آفیسر اختر حسین بھنگو کی موجودگی میں شروع ہوا اور اس موقع پر پاک فوج کے جوان بھی موجود رہے ۔ فوج کے جوانوں کی نگرانی میں این اے 131 کے ووٹوں کے تھیلے ریٹرنگ آفیسر کی عدالت میں پہنچائے گئے۔ اس موقع پر عمران خان کے نمائندے شعیب صدیقی کی جانب سے دوبارہ گنتی روکنے کی استدعا کی گئی جسے مسترد کر دیا گیا ۔ ووٹوں کی گنتی کا عمل آج بدھ کے روز بھی جاری رہے گا۔ میڈیا رپورٹ کے مطابق خواجہ سعد رفیق نے کہا کہ انتخابات کی رات پریذائنڈنگ آفیسر تھیلوں سمیت غائب تھے ، تھیلے 23گھنٹے کی تاخیر سے پہنچے ، مجھے نہیں پتا ان میں کیا بند ہے ۔ انہوںنے کہا کہ عمران خان پہلے کہتے تھے تمام حلقے کھولیں گے اب بہانے بنا رہے ہیں ۔ عمران خان آپ جھوٹ بولنا بند کریں آپ کے پاس کوئی مینڈیٹ نہیں ۔ انہوں نے کہا کہ پی ٹی آئی کی اتحادی ایم کیو ایم بھی کہہ رہی ہے کہ دھاندلی ہوئی ہے ۔
