اسلام آباد(وقائع نگار خصوصی) تحریک انصاف کے سینئر نائب صدر بابر اعوان نے وزیراعظم آفس میں وزیراعظم عمران خان سے ملاقات کی۔ ملاقات میں قانونی اور سیاسی امور پر تبادلہ خیال کیا گیا اور عوامی فلاح کے مختلف منصوبوں سے متعلق بھی مشاورت کی گئی۔ اس موقع پر وزیر اعظم عمران خان نے کہا کہ عوامی مفادات کا تحفظ موجودہ حکومت کی اولین ترجیح ہے۔محروم طبقے کا احساس کرنا ریاست کی ذمہ داری میں شامل ہے۔وزیراعظم نے مزید کہا کہ ملکی ترقی کی سمت متعین ہو چکی، آنے والا دور خوشحالی کا ہے۔معاشی ٹیم کے ہمراہ ملک کو بحرانی کیفیت سے نکالنے کی ہر ممکن کوشش کر رہے ہیں, وزیراعظم نے امید ظاہر کی کہ چند ماہ میں اقتصادی اور معاشی چیلنجز پر قابو پالیا جائے گا۔آئین اور قانون کی حکمرانی پر مکمل یقین رکھتے ہیں۔ وزیراعظم کا کہنا تھا کہ احتساب کی راہ میں نہ خود رکاوٹ بنیں گے نہ کسی کو بننے دیا جائیگا۔اس موقع پر بابر اعوان کا کہنا تھا کہ اپوزیشن جماعتیں سارا شور شرابا صرف احتساب سے بچنے کے لئے کر رہی ہے۔اپوزیشن کے پاس نہ سٹریٹ پاور ہے نہ عوامی حمایت۔بڑے چوروں کا احتساب ہو گا تو ہی نچلی سطح پر کرپشن رکے گی, بابر اعوان نے کہا کہ پوری قوم انصاف اور احتساب ہوتا دیکھنا چاہتی ہے۔امید ہے جلد مفرور اور اشتہاریوں کو بھی وطن واپس لا کر انصاف کے کٹہرے میں کھڑا کیا جائے گا۔
