جہاں بھی ضرورت ہوئی، سویلین کی بھرپور مدد کی جائےگی: ترجمان پاک فوج

اسلام آباد(ویب ڈیسک) ترجمان پاک فوج میجر جنرل بابرافتخار نے کہا ہے کہ جہاں بھی ضرورت ہوئی، سویلین کی بھرپور مدد کی جائے گی، مسلح افواج پوری طرح متحرک ہے،آرمی چیف نے فارمیشنز کو ہرممکن امداد کی ہدایت کی ہے،خوف وہراس روکنے کیلئے درست معلومات عوام تک پہنچانا ہوں گی،موبائل کمپنیوں سے مل کراحتیاطی تدابیر عوام تک پہنچائیں گے۔ نیشنل کمانڈ اینڈ کنٹرول سنٹر کے اجلاس کے بعد انہوں نے وفاقی معاون خصوصی اطلاعات فردوس عاشق اعوان اور معاون خصوصی صحت ڈاکٹر ظفر مرزا کے ہمراہ پریس کانفرنس کرتے ہوئے کہا کہ دعا ہے کہ اللہ پاکستان کو کورونا وباءسے محفوظ رکھے۔قومی سلامتی کمیٹی کے فیصلوں پر عمل کیلئے افواج پاکستان پوری طرح متحرک ہے۔ فوج کے تمام ادارے مشترکہ نگرانی کررہے ہیں۔ آرمی چیف نے فارمیشنز کو ہرممکن امداد کی ہدایت کی ہے۔ جہاں بھی ضرورت ہے وہاں سویلین کی بھرپور مدد کی جائے گی۔ انہوں نے کہا کہ لاہور ، اسلام آباد اور کراچی ایئرپورٹس پر انٹرنیشنل فلائٹ آپریشن ہورہے تھے، 21مارچ سے فیصل آباد، ملتان، کوئٹہ ایئرپورٹس پر بھی فلائٹ آپریشن ہوں گے وہاں فوج سویلین کے ساتھ ملکر اسکریننگ کے عمل کو یقینی بنائیں گے۔ داخلی راستوں پربھی لوگوں کی بھرپور چیکنگ کی جارہی ہے۔انہوں نے کہا کہ آدمی کی میڈیکل ٹیم نے بھی ڈی جی خان میں قرنطینہ کا دورہ کیا۔قرنطینہ بنانے سے متعلق بھی معاونت کررہے ہیں۔مسلح افواج کی جانب سے میڈیکل پلان مرتب کرلیا گیا ہے، تینوں مسلح افواج کی میڈیکل سہولتوں کو تیار کیا گیا ہے۔تینوں مسلح افواج کی میڈیکل فیسیلٹیز میں صرف مخصوص سرجری کی جارہی ہے۔ ترجمان پاک فوج نے کہا کہ ضروری ہے کہ کورونا کے حوالے سے خوف نہ پھیلے تواس کیلئے ضروری ہے کہ معلومات درست ہوں۔کمیونٹی میں غلط معلومات کو روکنے کیلئے بھی لائحہ عمل بنایا گیا ہے، تاکہ لوگوں تک صرف مصدقہ معلومات پہنچائی جائیں۔تمام صورتحال سے میڈیا کے ذریعے عوام کو آگاہ کیا جارہا ہے۔موبائل کمپنیوں سے مل کراحتیاطی تدابیر اورپیغامات عوام تک پہنچائیں گے۔ علماءکرام، میڈیا، سماجی لوگ ہر شخص ذمہ داری کا مظاہرہ کرے۔ہم اس بیماری کا متحد ہوکر ہی مقابلہ کرسکتے ہیں، صفائی نصف ایمان ہے، اللہ کی طرف رجوع کرنا ہے ، یہ بیماری سے لڑنے کا بڑا ہتھیار ہے۔اس موقع پروفاقی معاون خصوصی برائے صحت ڈاکٹر ظفر مرزا نے کہا کہ صدر مملکت نے طب کے شعبے میں چین کے ساتھ کافی چیزوں کا تبادلہ کیا ہے۔چین نے جس طرح اس وباءکو روکا اس کی پوری دنیا تعریف کررہی ہے۔ چین میں جو وبائی امراض کے طبی ماہرین ہیں، اگلے ہفتے میں ان کی پاکستانی ڈاکٹرز کے ساتھ ویڈیو کانفرنس کی جائے گی، چینی سفیر اس حوالے سے سہولت کاری دیں گے۔ انہوں نے کہا کہ اقوام متحدہ کے 194ممالک میں174ممالک میں کورونا کے مریض رپورٹ ہوئے ہیں،دنیا میں 2لاکھ 20ہزار کنفرم کیسز ہیں۔پاکستان میں ابھی 326کیسزمصدقہ ہیں۔ ہم اپنی ویب سائٹ پر ڈیش بورڈ بنارہے ہیں۔ وہاں ہر شخص کورونا مریضوں کی مصدقہ تعداد دیکھ سکے گا۔پچھلے 24گھنٹوں میں جو تبدیلی آئی وہ نہایت افسوس کے ساتھ کہتا ہوں کہ 2لوگوں کی کورونا کے باعث اموات ہوئیں۔اگر ہم اپنی ذمہ داریاں ادا کریں اور سنجیدگی دکھائیں تو ہم اس پر کنٹرول کرسکتے ہیں۔وفاقی اور صوبائی حکومتیں ہر سطح پر اپنی ذمہ داری ادا کررہی ہیں۔معاون خصوصی اطلاعات ڈاکٹرفردوس عاشق اعوان نے کہا کہ عوام کے جان ومال کا تحفظ حکومت کی ذمہ داری ہے، حکومت نے اپنی ذمہ داری میں کوئی کوتاہی نہیں برتی، وزیراعظم عمران خان صورتحال نہ صرف آگاہ ہیں بلکہ ساری چیزوں کو مانیٹر بھی کررہے ہیں،وزیراعظم نے کل خود جاکر زائرین کے مسائل سنے۔ صوبائی حکومتیں وفاق کے تعاون سے مل کر تمام چیلنجز سے نمٹ رہی ہیں۔ وزیراعظم نے قوم کو خطاب میں پیغام دیا کہ ہم نے کورونا سے مل کر لڑنا ہے۔