راولپنڈی (مانیٹرنگ ڈیسک) شمالی وزیرستان کے علاقے دتہ خیل میں کارروائی کے دوران سکیورٹی فورسز سے فائرنگ کے تبادلے میں 2 دہشت گرد مارے گئے۔ پاک فوج کے شعبہ تعلقات عامہ آئی ایس پی آر کے مطابق دتہ خیل میں سکیورٹی فورسز سے فائرنگ کے تبادلے کے دوران 2 دہشت گرد ہلاک ہوگئے۔ آئی ایس پی آر کے مطابق دہشت گردوں کی فائرنگ سے تبادلے میں نائیک عادل شہزاد نے جام شہادت نوش کیا۔ شہید نائیک عادل شہزاد کا تعلق مانسہرہ کے علاقے سے تھا۔ واضح رہے کہ تین روز قبل بھی شمالی وزیرستان میں فورسز کا انٹیلی جنس بیسڈ آپریشن کے دوران 7 دہشت گرد ہلاک ہوگئے، دہشت گردوں کی فائرنگ کے تبادلے میں 2 جوانوں نے بھی جام شہادت نوش کیا تھا۔ آئی ایس پی آر کا کہنا تھا کہ شہادت پانے والے جوانوں میں سپاہی مومن شاہ اور محمد ساجد شامل تھے، شہید سپاہی مومن شاہ کا تعلق ڈی آئی خان اور شہید ساجد کا تعلق ایبٹ آباد سے ہے۔ واضح رہے کہ اس سے قبل بھی سکیورٹی فورسز کی جانب سے شمالی وزیرستان اور مہمند میں انٹیلی جنس بیسڈ آپریشن کے دوران 7 دہشت گرد مارے گئے تھے۔ آئی ایس پی آر کا کہنا تھا کہ کارروائی شمالی وزیرستان کے عدل خیل گاﺅں میں کی گئی، دہشت گرد علاقے سے فرار ہوتے ہوئے مارے گئے، دہشت گردوں سے اسلحہ، مواصلاتی آلات برآمد کرلیے گئے۔
شمالی وزیرستان، آپر یشن کے دوران نائیک عادل شہزاد شہید،2دہشتگرد مارے گئے
