پنجاب حکومت نے کرونا وائرس کے کیسز میں اضافے کے بعد لاہور سمیت صوبے کے متعدد مقامات پر مائیکرو اسمارٹ لاک ڈاؤن نافذ کرتے ہوئے 830 مقامات کو سیل کردیا۔
پنجاب حکومت نے صوبے بھر کے 830 مقامات کو سیل کیا جن میں 435 مقامات صرف لاہور شہر کے ہیں۔
سيل مقامات ميں کرونا کے 1416 کيسز رپورٹ ہوئے ہیں۔ علاقے کے مکین 14 روز تک قرنطینہ میں رہیں گے جبکہ سیل علاقوں میں اسمارٹ لاک ڈاؤن کے باعث کسی کو آنے جانے کی اجازت نہیں ہوگی۔
سیل کیے جانے والے علاقوں میں راولپنڈی کے 47، ملتان کے 44، بہاولپور کے 37، بھکر کے 35، گجرات کے 29، ڈیرہ غازی خان کے 17، فیصل آباد کے 34 اور گوجرانوالہ کے 14، ساہیوال کے 16، سرگودھا کے 24، جہلم کے 8، چنیوٹ کے 7 اور قصور کے 3مقامات شامل ہیں۔
مائیکرو اسمارٹ لاک ڈاؤن کے دوران پولیس علاقے کی متعدد گلیوں کے باہر تعینات رہے گی۔
پاکستان میں آج کرونا وائرس کے ایک ہزار 123 کیسز کی تصدیق ہوئی جبکہ 12 افراد لقمہ اجل بنے۔ ملک میں 13 ہزار 242 ایکٹیو کیسز ہیں جبکہ 707 افراد کی حالت تشویش ناک ہے۔
اس سے قبل کرونا کے بڑھتے کیسز کے باعث اسلام آباد کے کئی علاقوں کو اسمارٹ لاک ڈاؤن کے تحت سیل کیا گیا اور ماسک پہننا لازمی قرار دیا۔
اسمارٹ لاک ڈاؤن کے نفاذ کے بعد مذکورہ علاقوں میں شہریوں کی آمد و رفت محدود کردی گئی جب کہ میڈیکل اسٹور اور اشیائے خور و نوش کے علاوہ دیگر دکانیں شام 5 بجے تک بند کردی جائیں گی۔
لاک ڈاؤن کا اطلاق بروز ہفتہ 31 اکتوبر کی صبح 10 بجے سے شروع ہوا۔ شہریوں کو بغیر ضرورت گھر سے باہر نکلنے کی اجازت نہیں ہوگی، جو شہری گھروں سے باہر نکلیں گے انہیں ماسک کا استعمال لازمی کرنا ہوگا
