مسلم لیگ ن کے رہنما شاہد خاقان عباسی نے چیئرمین قومی احتساب بیورو (نیب) جسٹس (ر) جاوید اقبال پر ملازمت میں توسیع مانگنےکا الزام لگادیا۔
احتساب عدالت میں پیشی کے بعد شاہد خاقان عباسی نے میڈیا سےگفتگو میں کہا کہ چیئرمین نیب مدت ملازمت میں توسیع کےلیے ہاتھ پیر مار رہے ہیں ، عمران خان چیئرمین نیب کو ملازمت میں توسیع دیں گے۔
شاہد خاقان عباسی نےکہا کہ چیئرمین نیب جعلی کیس ختم کریں، یہ تماشا لگانا چھوڑ دیں، کیا حکومت کے کیس چیئرمین نیب کو نظر نہیں آتے، میرےکیس میں سرکاری گواہ نے کہا کہ ایل این جی ٹرمینل سے ملک کا کوئی نقصان نہیں ہوا جب کہ چینی اسکینڈل میں ایف آئی اے کے گواہ نے بھی اپنے ادارے کے خلاف بیان دیا۔
انہوں نے کہا کہ جھوٹ کا یہ عالم ہے وفاقی وزیر جھوٹ بول کر چلے جاتے ہیں، اگر وفاقی وزیر کو بجٹ کا معلوم نہیں تھا تو پاس کیسے ہوا؟ اعداد و شمار کا ادارہ آزاد ہوتا ہے جسے وزارت خزانہ کے زیرسایہ کیا جا رہا ہے تاکہ جھوٹ کو چھپایا جائے۔
ان کا کہنا تھا کہ شہباز شریف نے تین منٹ تقریر کی تو حکومتی بنچوں پر آگ لگ گئی، تاریخ میں پہلی مرتبہ حکومتی وزرا نے ہلڑ بازی کی ہے،کل اسپیکر خود ہلڑ بازی میں شامل ہو جائیں گے کیونکہ ان میں شرم ختم ہو چکی ہے۔
