جسٹس فائز عیسیٰ کے معاملے پر فروغ نسیم کے بیان پر فواد چوہدری بھی بول پڑے

اسلام آباد: (ویب ڈیسک) سابق وزیراعظم عمران خان کی جانب سے جسٹس قاضی فائز عیسیٰ کے خلاف ریفرنس کو غلطی قرار دینے کے بیان پر سابق وزیر قانون فروغ نسیم نے ردعمل کا اظہار کیا تھا اور اب اس معاملے میں سابق وزیر اطلاعات فواد چوہدری بھی کود پڑے ہیں۔
اپنی ٹوئٹ میں فواد چوہدری کا کہنا تھاکہ فروغ نسیم بطور وزیرقانون آپ کو ذمہ داری لینی چاہیے، حقیقت یہ ہے کہ تمام معاملہ آپ نے کھڑا کیا۔
انہوں نے کہا کہ میں نےکابینہ میں کہا ججز کے خلاف ریفرنس بھیجنا حکومت کا کام نہیں، الزامات کے ثبوت ہیں تو بار ایسوسی ایشن ریفرنس کرلے۔
فواد چوہدری کا کہنا تھاکہ فروغ نسیم، آپ کے اصرار پر ریفرنس بھیجا گیا۔
خیال رہے کہ سابق وزیراعظم عمران خان نے صحافیوں سے غیررسمی گفتگو میں اعتراف کیا ہے کہ جسٹس قاضی فائزعیسیٰ کےخلاف دائر کیس غلطی تھی، جسٹس فائز عیسیٰ کےخلاف کارروائی غیرضروری سمجھتا ہوں۔
انہوں نے کہا تھا کہ وزیرقانون نےجسٹس قاضی فائزعیسیٰ کے مختلف فلیٹس اوراثاثوں پربریف کیاتھا۔
اس پر سابق وزیر قانون فروغ نسیم کا کہنا تھاکہ عمران خان نے خود جسٹس فائزعیسیٰ کے خلاف ریفرنس دائر کرنے پر اصرار کیا، انہوں نے اے آر یو کے مواد کی روشنی میں ریفرنس دائر کرنے پر اصرار کیا تھا۔