کارسرکار میں مداخلت کا کیس، فواد چودھری کی عبوری ضمانت منظور

لاہور : (ویب ڈیسک) انسداد دہشتگردی عدالت نے پاکستان تحریک انصاف کی ریلی میں پولیس پر تشدد، اقدام قتل، قتل، جلاؤ گھیراؤ کرنے اور کار سرکار میں مداخلت کے معاملے پر پی ٹی آئی رہنما فواد چودھری کی عبوری ضمانت منظور کرلی۔
ذرائع کے مطابق پی ٹی آئی رہنما فواد چوہدری کے وکلاء ظفر اقبال اور سکندر ذوالقرنین ایڈووکیٹ نے انسداد دہشت گردی عدالت میں عبوری ضمانت کی درخواست دائر کی ، انسداد دہشتگردی عدالت کے جج اعجاز احمد بٹر نے فواد چودھری کی درخواست پر سماعت کی، فواد چودھری عدالت کے روبرو پیش ہوئے۔
فواد چوہدری کے وکیل سکندر ذوالقرنین ایڈووکیٹ نے دلائل دیے کہ نگران حکومت نے سیاسی مقدمہ درج کیا ہے، ہم شامل تفتیش ہو کر بے گناہی ثابت کرنا چاہتے ہیں، ڈر ہے کہ پولیس گرفتار کر لے گی، عدالت پولیس کو گرفتاری سے روکنے کا حکم دے ۔
انسداد دہشتگردی عدالت نے5 لاکھ روپے کے ضمانتی مچلکوں کے عوض پی ٹی آئی رہنما فواد چودھری کی 25 مارچ تک عبوری ضمانت منظور کرلی۔
واضح رہے کہ تھانہ ریس کورس پولیس نے 12 مختلف دفعات کے تحت فواد چودھری کیخلاف مقدمہ درج کیا تھا، مقدمہ میں دہشت گردی ، قتل ،اقدام قتل ، لڑائی جھگڑا ، کارسرکار میں مداخلت سمیت بارہ دفعات شامل ہیں ۔