آرتھر ایش اسٹیڈیم میں کھیلے گئے میچ میں ناوونے نے جوکووچ کو 7-6(5)، 5-7، 4-6، 6-2، 6-1 سے شکست دی۔ مقابلہ 4 گھنٹے 36 منٹ تک جاری رہا اور یہ جوکووچ کے گرینڈ سلیم کیریئر کا طویل ترین ابتدائی راؤنڈ میچ بھی بن گیا۔
جوکووچ نے پہلے سیٹ میں ٹائی بریک پر شکست کے بعد اگلے دو سیٹس جیت کر مقابلے میں برتری حاصل کرلی تھی، تاہم چوتھے سیٹ میں ناوونے نے شاندار واپسی کرتے ہوئے میچ کا رخ تبدیل کردیا۔ پانچویں سیٹ میں بھی ارجنٹائن کے کھلاڑی نے مکمل غلبہ برقرار رکھا اور 6-1 سے سیٹ جیت کر تاریخی کامیابی اپنے نام کرلی۔
میچ کے دوران 39 سالہ جوکووچ کو جسمانی مشکلات کا بھی سامنا رہا۔ وہ طبیعت کی خرابی، الٹی، مروڑ اور جسم کے مختلف حصوں میں تکلیف کے باعث واضح طور پر مشکلات میں دکھائی دیے۔ پانچویں سیٹ سے قبل انہیں میڈیکل ٹائم آؤٹ بھی لینا پڑا۔
یہ شکست جوکووچ کے لیے اس لحاظ سے بھی تاریخی ہے کہ وہ 2006 کے آسٹریلین اوپن کے بعد پہلی مرتبہ کسی گرینڈ سلیم کے پہلے راؤنڈ میں شکست سے دوچار ہوئے ہیں۔ اس سے قبل وہ یو ایس اوپن کے ابتدائی راؤنڈ میں کبھی نہیں ہارے تھے۔
جوکووچ، جو 24 گرینڈ سلیم ٹائٹلز اپنے نام کرچکے ہیں، اس ٹورنامنٹ میں ریکارڈ 25ویں گرینڈ سلیم اور پانچویں یو ایس اوپن ٹائٹل کے حصول کی کوشش میں تھے، تاہم ناوونے نے ان کا سفر پہلے ہی راؤنڈ میں ختم کردیا۔
دوسری جانب ماریانو ناوونے کے لیے یہ کامیابی ان کے کیریئر کی سب سے بڑی فتوحات میں سے ایک ہے۔ میچ کے بعد ارجنٹائن کے کھلاڑی نے جوکووچ کو شکست دینے پر خوشی کا اظہار کرتے ہوئے اسے اپنے لیے ناقابلِ یقین لمحہ قرار دیا۔
