امریکی صدارتی امیدوار ڈونلڈ ٹرمپ پر حالیہ جان لیوا حملے کے بعد ایلون مسک نے آئرن مین طرز کا ’میٹل سوٹ آف آرمر‘ حفاظتی لباس تیار کرنے کا ارادہ ظاہر کیا ہے۔
مائیکرو بلاگنگ ویب سائٹ ایکس پر ایک صارف کو جواب دیتے ہوئے ٹیسلا اور اسپیس ایکس کے سربراہ نے کہا کہ ‘شاید اب وقت آگیا ہے کہ فلائنگ میٹل سوٹ آف آرمر بنایا جائے’۔
ڈونلڈ ٹرمپ انتخابی ریلی کے دوران ‘قاتلانہ حملے’ میں زخمی
ایلون مسک نے یہ دعویٰ بھی کیا کہ گزشتہ 8 ماہ کے دوران میں دو افراد نے الگ الگ مواقع پر ان کی جان لینے کی کوششیں کی اور کہا کہ ’مستقبل خطرناک ہے۔‘
مسک نے تفصیلات بتاتے ہوئے کہا کہ ’انہیں (مبینہ حملہ آوروں کو) بندوقوں کے ساتھ ٹیکساس میں ٹیسلا ہیڈکوارٹر سے 20 منٹ کی مسافت پر گرفتار کیا گیا تھا۔‘
خیال رہے کہ معروف امریکی ٹیکنالوجی باس ایلون مسک نے یہ بیان ایسے وقت میں دیا گیا ہے جب انہوں نے قاتلانہ حملے کے بعد ڈونلڈ ٹرمپ کی مکمل حمایت کرنے کا اعلان کیا تھا۔
اس کے علاوہ ایلون مسک نے ٹرمپ کو منتخب کرانے کے لیے کام کرنے والی پولیٹیکل ایکشن کمیٹی ’امریکا پی اے سی‘ کو بھاری رقم بھی عطیہ کی ہے
ڈونلڈ ٹرمپ پر فائرنگ کرنے والے حملہ آور کی شناخت ہوگئی
ڈونلڈ ٹرمپ کو پینسلوانیا کے دیہی علاقے میں ایک انتخابی مہم کے دوران اسٹیج پر آنے کے تقریباً 15 منٹ بعد گولی ماری گئی تھی۔
گولی ان کے دائیں کان کو چھوتی ہوئی گزری اور انہیں فوری طور پر سیکرٹ سروس کے حفاظتی حصار میں وہاں سے اسپتال منتقل کردیا گیا تھا جبکہ حملہ آور کو موقع پر ہی گولیوں سے بھون دیا گیا تھا۔
