پنجاب کی وزیر اعلیٰ مریم نواز نے صوبے میں ہیلتھ کلینک پراجیکٹ کا افتتاح کرتے ہوئے صوبے میں موٹرسائیکل منی کلینک متعارف کرانے کا اعلان کردیا۔
وزیر اعلیٰ پنجاب مریم نوازشریف نے لاہور میں مریم نواز ہیلتھ کلینک پراجیکٹ کی افتتاحی تقریب سے خطاب کے دوران ڈاکٹروں سے مریضوں کی خدمت کا عہد لیا اور اعلان کیا کہ پنجاب میں موٹر سائیکل منی کلینک متعارف کرائی جائے گی۔
انہوں نے ڈائیلسز کے مریضوں کے لیے سالانہ فنڈ 7 لاکھ سے 10 لاکھ روپے کرنے، پنجاب بھر میں ٹاپ ون پیشنٹ کے لیے انسولین کی گھروں میں فراہمی کے پراجیکٹ کا اعلان، صوبے میں آرگن ایمپلانٹ کے لیے پراجیکٹ جلد شروع کرنے کا بھی اعلان کیا۔
وزیراعلیٰ پنجاب نے اسپتالوں میں مریضوں کی رہنمائی کے لیے ہیلپ ڈیسک قائم اور فعال کرنے کا حکم دیا اور کہا کہ ڈاکٹر”ایک انسان کی جان بچائی، پوری انسانیت کی جان بچائی“ کو گائیڈ لائن بنائیں۔
انہوں نے کہا کہ ڈاکٹر نئے مریم نوازہیلتھ کلینک کی دیکھ بھال، صفائی ستھرائی اور بہتر انتظامات یقینی بنائیں، اسپتالوں میں نرسوں کی کمی بھی پوری کر رہے ہیں اور موٹرسائیکل پر پیرا میڈیکل اسٹاف ابتدائی تشخیص اور علاج مہیا کرے گا۔
ان کا کہنا تھا کہ ٹیلی میڈیسن کے ذریعے پیرا میڈیکل اسٹاف کا ڈاکٹرسے رابطہ ہوگا، سچے دل سے عوام خدمت کرنے والے ڈاکٹروں کو دیکھ کر دل خوش ہوتا ہے۔
مریم نواز نے کہا کہ مسائل بہت زیادہ ہیں راتو ں رات تبدیلی ممکن نہیں، 12کروڑ آبادی کے علاوہ بلوچستان، کے پی، کشمیر اور افغانستان سے افراد بھی پنجاب کے ہیلتھ سسٹم سے فائدہ اٹھا رہے ہیں۔
ان کا کہنا تھا کہ وسائل اور اسپتالوں کا کم ہونا بہت بڑا چیلنج ہے، پنجاب میں تقریباً 90فیصدادویات مفت مہیا کی جا رہی ہیں، 9 سے 5 بجے تک وقت گزرانے کا رویہ افسوس ناک ہے، اس کو بدلنا ہوگا۔
مریم نواز کا کہنا تھا کہ اسپتال سے ادویات حتی کہ انسولین کا چوری ہونا انہتائی تکلیف دہ ہے، ادویات چوری سے متعلق سوال سن کر چین کے اسپتال کے حکام حیران رہ گئے۔
انہوں نے کہا کہ لاہور کے تین بڑے اسپتالوں میں بہتری لانے کے لیے اپنے افسران لگائے ہیں، فیلڈ اسپتالوں سے 70لاکھ سے زائد لوگ مستفید ہوچکے ہیں، بزرگ مریضوں کو اسپتال جانا نہیں پڑتا، گھر کے پاس علاج ممکن ہے۔
وزیراعلیٰ پنجاب نے کہا کہ کلینک آن ویلز گلی محلوں میں علاج کیا جا رہا ہے، چاہتی ہوں کم از کم ایک لاکھ لوگوں کو دو ماہ کے لیے کینسر کی ادویات گھر بیٹھے ملیں۔
انہوں نے کہا کہ پنجاب میں بلوچستان، کے پی، سندھ اور آزاد کشمیر کے مریضوں کا علاج ہورہا ہے، دو ماہ کے لیے مفت ادویات گھر بیٹھے ملنے پر بلوچ مریض نے کہا کہ آدھا بلوچ ہوں اور آدھا پنجابی ہوں۔
ان کا کہنا تھا کہ کینسر کے علاج کے لیے نیا اسپتال بنا رہے ہیں، چینی طریقہ کار سے کینسر ٹیومر کا علاج ممکن ہے، پنجاب کے اسپتالوں میں دنیا کی بہترین مشینری لائیں گے۔
مریم نواز نے کہا کہ پنجاب میں 1250 بنیادی مراکز صحت کی تعمیر و بحالی کی جا رہی ہے، جن میں سے 904 مکمل ہوچکے ہیں، ری ویمپنگ کے بعد ہمارے اسپتال دنیا کے بہترین اسپتالوں کے برابر ہوں گے۔
انہوں نے کہا کہ ڈاکٹر دراصل حقیقی تبدیلی کے ایجنٹ ہیں، خدمت میں ہاتھ بٹائیں، مریم نواز ہیلتھ کلینک میں ای سی جی، الٹراساؤنڈ اور دیگر مشینیں بھی دیں گے، بنیادی تشخیص کے لیے سی ٹی اسکین اور ایم آر آئی مشینیں بھی دیں گے۔
وزیراعلیٰ کا کہنا تھا کہ انسولین ہوم ڈیلیوری کے لیے کولڈ چین بنا رہے ہیں، چلڈرن ہارٹ سرجری پروگرام سے پرانے مریضوں کا بیک لاگ ختم ہو رہا ہے، بہت سے بچے نازک حالت میں تین تین سال سے ہارٹ سرجری کا انتظارکر رہے تھے۔
