پولیس حراست میں موجود بانی پی ٹی آئی کی تینوں بہنوں نے اڈیالہ روڑ پر واقع شادی ہال میں دھرنا دے دیا۔
شادی ہال کے باہر پی ٹی آئی کے کارکنان جمع ہونا شروع ہوگئے ہیں، جو نعرے بازی کر رہے ہیں، پولیس ہال کا مرکزی دروازہ بند کردیا ہے۔
پی ٹی آئی کارکنوں نے علیمہ خان سمیت تینوں بہنوں کی رہائی کا مطالبہ کیا ہے، شادی ہال کے باہر پارٹی قیادت موجود نہیں ہے۔
ذرائع کے مطابق راولپنڈی پولیس نے تینوں بہنوں کو گھر جانے کی پیشکش کی ہے، جسے قبول کرنے سے انہوں نے انکار کردیا ہے۔
راولپنڈی پولیس نے بانی پی ٹی آئی کی تینوں بہنوں کو حراست میں لے لیا، صاحبزادہ رضا، عالیہ حمزہ بھی حراست میں لیے جانے والوں میں شامل ہیں، چیئرمین پی ٹی آئی بیرسٹر گوہر کی بانی کی بہنوں کو حراست میں لینے کی مذمت کی ہے۔
ذرائع کے مطابق پولیس حکام نے بانی پی ٹی آئی کی بہنوں کو اڈیالہ جیل کے باہر سے حراست میں لیا اور کچھ آگے جاکر گاڑی روکی اور خواتین سے کہا کہ آپ کو تھانے نہیں لے جانا ہے اب آپ اپنے گھر جائیں۔
ذرائع کے مطابق بانی پی ٹی آئی کی بہنوں اور عالیہ حمزہ نے پولیس کی بات ماننے اور واپس جانے سے انکار کردیا۔
ذرائع کے مطابق خواتین نے پولیس حکام سے اصرار کیا کہ آپ نے حراست میں لیا ہے تو تھانے لے جائیں۔
اس کے بعد پولیس پی ٹی آئی کی زیر حراست خواتین کو لے کر نجی شادی ہال پہنچی اور تمام خواتین پولیس وین سے اتر کر شادی ہال کے لان میں بیٹھ گئیں۔
پولیس افسران بھی لان میں بانی پی ٹی آئی کی بہنوں کے ساتھ بیٹھ گئے ہیں، شادی ہال کا مرکزی گیٹ بند ہے جبکہ عام افراد کو داخلے سے روک دیا گیا ہے۔
اس سے قبل راولپنڈی پولیس نےبانی تحریک انصاف کی تینوں بہنوں کو حراست میں لے لیا تھا اور انہیں وین بیٹھایا تھا۔
پولیس حکام کی طرف سے حراست میں لیے گئے دیگر رہنماؤں میں صاحبزادہ حامد رضا، عالیہ حمزہ ، نادیہ خٹک اور بانی چیئرمین کے کزن قاسم خان شامل ہیں۔
