پاک بھارت کشیدگی کے تناظر میں دفتر خارجہ نے کہا ہے کہ فی الحال ثالثی کی کوئی پیشکش نہیں ہوئی اور نہ کوئی منصوبہ ہے، جب پیشکش ہوگی تب ہم دیکھیں گے۔
ہفتہ وار بریفنگ میں بتایا کہ ترجمان دفتر خارجہ نے کہا کہ پاکستان بھارت کے سندھ طاس معاہدے پر سفارتی نوٹ کو مسترد کرتا ہے، سندھ طاس پر ہمارا موقف اور پالیسی غیر مبہم ہے۔ سندھ طاس معاہدہ ہماری لائف لائن ہے اور بھارت نے بغیر کسی ثبوت کے نتیجے پر چھلانگ لگائی، یہ انتہائی بدقسمت عمل ہے۔
ترجمان نے کہا کہ مقبوضہ کشمیر میں ہونے والے ایک واقعے پر بھارت فوری اوور ڈرائیو پر نکل گیا ہے، بھارتی میڈیا کسی بھی قابل اعتماد شواہد کے بغیر پاکستان پر الزام تراشی میں ملوث ہے۔
شفقت علی خان نے کہا کہ مقبوضہ کشمیر میں 8 لاکھ بھارتی فوج موجود ہے اس کے باوجود یہ واقعہ ہوا، بھارت نے جو ماحول بنایا اس میں باہمی تجارت مشکل ہے۔
انہوں نے کہا کہ پاکستان کی آبی و اقتصادی سیکیورٹی کے لیے سندھ طاس معاہدہ انتہائی اہم ہے، پاکستان ایک ذمہ دار ملک ہے جو کہ عالمی معاہدوں پر اپنی ذمہ داریاں ادا کر رہا ہے۔ پاکستان اور اس کی مسلح افواج اپنی خودمختاری، سرحدوں اور عوام کے دفاع کے لیے مکمل طور پر تیار ہیں۔
ترجمان نے کہا کہ پاکستان انڈس واٹرز ٹریٹی کو معطل کرنے کے بھارتی فیصلے کو سختی سے مسترد کرتا ہے۔ پانی پاکستان کے لیے زندگی و موت کا مسئلہ ہے اگر بھارت نے پانی روکنے یا رخ موڑنے کی کوشش کی تو یہ جنگی اقدام تصور ہوگا۔ ہم سندھ طاس معاہدے پر اپنی پالیسی کا اعادہ کرتے ہیں، یہ معاہدہ 250 ملین افراد کی زندگی کا معاملہ ہے۔
ترجمان شفقت علی خان نے کہا کہ بھارت کے غیر ذمہ دارانہ رویے کے پیش نظر پاکستان تمام دو طرفہ معاہدے بشمول شملہ معاہدہ، معطل کرنے کا حق محفوظ رکھتا ہے۔
ترجمان کے مطابق گزشتہ روز نیشنل سیکیورٹی کونسل کا اہم اجلاس ہوا جس میں بھارت کی طرف سے دیے گئے بیان میں موجود درپردہ دھمکی کی بھی شدید مذمت کی گئی۔
اجلاس میں عالمی برادری کو بھارت کے بین الاقوامی قوانین کی خلاف ورزی، بیرون ملک قتل کی وارداتوں اور دہشت گردی کے واقعات کا نوٹس لینے کا مطالبہ کیا گیا۔
انہوں نے بتایا کہ واہگہ بارڈر فوری طور پر بند کیا جاتا ہے، صرف 30 اپریل 2025 تک واپس جانے والوں کو اجازت ہوگی۔ سارک ویزا اسکیم کے تحت بھارتی شہریوں کے تمام ویزے منسوخ کر دیے گئے، صرف سکھ یاتری مستثنا ہوں گے۔
ترجمان نے کہا کہ بھارتی نیول، ایئر اور ڈیفنس ایڈوائزرز کو ناپسندیدہ شخصیات قرار دے کر 30 اپریل تک ملک چھوڑنے کی ہدایت کی گئی ہے۔ بھارتی ہائی کمیشن کے عملے کی تعداد 30 افراد تک محدود کرنے کا فیصلہ کیا گیا ہے۔
شفقت علی خان نے کہا کہ بھارتی ایئر لائنز کے لیے فضائی حدود بند کی جاتی ہیں اور بھارت کے ساتھ تمام تجارتی روابط فوری طور پر معطل کیے جاتے ہیں۔
انہوں نے کہا کہ افغانستان کی جانب سے افغانوں کی وطن واپسی پر ایک ہاٹ لائن قائم کی ہے، افغانستان ہمارا ہمسایہ ہے جس سے ہمارے صدیوں پرانے تعلقات ہیں۔ نائب وزیراعظم کے دورے میں ہم نے مختلف معاملات پر اتفاق کیا ہے، ہم اپنے دوست ممالک سے بھارت کی ٹرانس نیشنل دہشت گردی پر بھی معلومات کا تبادلہ کرتے رہتے ہیں۔
ترجمان کا کہنا تھا کہ وزیر اعظم شہباز شریف نے ترکیہ کا دورہ کیا جہاں انہوں نے ترک صدر سے ملاقات کی۔
انہوں نے بتایا کہ گزشتہ دنوں متحدہ عرب امارات کے وزیر خارجہ نے پاکستان کا دورہ کیا، انہوں نے وزیر اعظم اور وزیر خارجہ سے ملاقاتیں کی۔ ملاقاتوں میں خطے اور عالمی منظر نامے پر گفتگو ہوئیں، کلچرل کوآپریشن پر ایم او یوز دستخط ہوئیں۔ روانڈا کے وزیر خارجہ نے بھی پاکستان کا دورہ کیا۔
ترجمان کے مطابق پاکستان نے پاپ فرانسیس کی وفات پر دلی افسوس کا اظہار کیا ہے، پاکستان ان کے شاندار خدمات کو سراہتا ہے۔
