وزیراعظم شہباز شریف وفاقی وزرا کے ہمراہ کوئٹہ پہنچ گئے، عسکری حکام کے مطابق فیلڈ مارشل جنرل عاصم منیر بھی کوئٹہ پہنچ رہے ہیں، جہاں سول و عسکری اعلیٰ سربراہان اہم قبائلی جرگے میں شرکت کریں گے۔
وزیراعظم پاکستان محمد شہباز شریف کوئٹہ پہنچ گئے ہیں، ایئرپورٹ پر وزیراعلیٰ بلوچستان میر سرفراز بگٹی، قائم مقام گورنر عبدالخالق اچکزئی نے وزیراعظم اور وفاقی وزرا کا استقبال کیا۔
وزیراعظم کے ہمراہ وفاقی وزرا احسن اقبال، عطا اللہ تارڑ، اور رکن قومی اسمبلی جمال شاہ کاکڑ بھی کوئٹہ پہنچے ہیں، وزیر اعظم دورے کے دوران ایک اہم جرگے میں شرکت کریں گے۔
عسکری حکام کے مطابق فیلڈ مارشل، آرمی چیف جنرل عاصم منیر بھی کوئٹہ میں ہونے والے اعلیٰ سطح کے قبائلی جرگے میں شرکت کے لیے کوئٹہ پہنچ رہے ہیں، اس جرگے میں بلوچستان میں بھارت کے حمایت یافتہ فتنہ الخوارج کی دہشتگردی کے خلاف اہم حکمت عملی کے حوالے سے قبائلی رہنماؤں کو اعتماد میں لیا جائے گا۔
حکومت پاکستان بلوچستان کے قبائلی عمائدین کی آرا کو سن کر اپنی حکمت عملی کو مزید بہتر بناتے ہوئے دہشت گردی کیخلاف اقدامات کے لیے بلوچ عوام کو اعتماد میں لے کر آگے بڑھنے کی خواہاں ہے۔
