اسلام آباد :یومِ ارض کے موقع پر گوگل کا زمین کے دلفریب مناظر پر مبنی خصوصی ڈوڈل جاری کردیا۔
تفصیلات کے مطابق آج دنیا بھر میں 56واں سالانہ "یومِ ارض” منایا جا رہا ہے، جس کا مقصد ماحولیاتی تحفظ کی اہمیت کو اجاگر کرنا اور زمین کو درپیش سنگین خطرات، جیسے موسمیاتی تبدیلی اور آلودگی، کے خلاف عوامی شعور بیدار کرنا ہے۔
اس سال یہ دن "Our Power, Our Planet” (ہماری طاقت، ہمارا سیارہ) کے تھیم کے تحت منایا جا رہا ہے۔
اس تھیم کا مقصد انفرادی اور اجتماعی کوششوں کے ذریعے صاف توانائی کی جانب منتقلی کو تیز کرنا اور ماحولیاتی نظام کے تحفظ کے لیے ہر شخص کے کردار کو نمایاں کرنا ہے۔
سرچ انجن گوگل نے بھی اس موقع پر ایک خوبصورت اور منفرد ڈوڈل جاری کیا ہے، اس ڈوڈل میں زمین کے مختلف براعظموں کے فضائی مناظر کو دکھایا گیا ہے، جہاں ‘Google’ کے حروف دنیا کے مختلف مقامات کی قدرتی خوبصورتی کی نمائندگی کر رہے ہیں۔
برطانوی جزائر، کینیڈا، ارجنٹائن، پاپوا نیو گنی، سینیگال اور انڈونیشیا کے قدرتی مناظر کو اس فن پارے کا حصہ بنایا گیا ہے تاکہ سیارے کی وسعت اور تنوع کو اجاگر کیا جا سکے۔
پاکستان میں سرگرمیاں
پاکستان میں بھی یومِ ارض کے حوالے سے سرکاری اور نجی سطح پر مختلف تقریبات کا انعقاد کیا جا رہا ہے۔
وفاقی اور صوبائی دارالحکومتوں میں ماحولیاتی سیمینارز، شجرکاری مہم اور آگاہی واک کا اہتمام کیا گیا ہے۔
تعلیمی اداروں میں طلباء کو پلاسٹک کے استعمال میں کمی اور پانی کی بچت جیسے اقدامات کے بارے میں آگاہی دی جا رہی ہے۔
ماہرینِ ماحولیات کا کہنا ہے کہ پاکستان موسمیاتی تبدیلیوں سے سب سے زیادہ متاثر ہونے والے ممالک میں شامل ہے، اس لیے یہاں پائیدار ترقی اور ماحول دوست پالیسیوں کی ضرورت پہلے سے کہیں زیادہ ہے۔
