پاکستان نے برطانیہ کی جانب سے پاکستانی طلبہ کے اسٹوڈنٹ ویزوں کے اجرا میں تاخیر پر شدید تشویش کا اظہار کیا ہے۔ وفاقی وزیر قانون و انصاف سینیٹر اعظم نذیر تارڑ نے برطانوی ہائی کمشنر جین میریٹ سے ملاقات کے دوران یہ معاملہ اٹھایا۔
ملاقات میں وزیر قانون نے نشاندہی کی کہ ویزوں میں تاخیر کے باعث پاکستانی طلبہ کو مشکلات کا سامنا ہے اور اگر بروقت فیصلہ نہ ہوا تو سینکڑوں طلبہ کا تعلیمی سال متاثر ہونے کا خدشہ ہے۔
برطانوی ہائی کمشنر جین میریٹ نے پاکستانی وزیر کو یقین دہانی کرائی کہ طلبہ کے ویزوں میں تاخیر کے معاملے کو متعلقہ حکام کے ساتھ اٹھایا جائے گا اور اسے حل کرنے کے لیے اقدامات کیے جائیں گے۔
ملاقات کے دوران پاکستان اور برطانیہ کے دوطرفہ تعلقات، باہمی دلچسپی کے امور اور مختلف شعبوں میں تعاون کو مزید مضبوط بنانے کے طریقوں پر بھی تبادلہ خیال کیا گیا۔
یہ معاملہ ایسے وقت میں سامنے آیا ہے جب پاکستانی طلبہ برطانیہ کی جامعات میں نئے تعلیمی سیشن کے آغاز سے قبل اپنے ویزوں کے فیصلوں کے منتظر ہیں، جبکہ بعض درخواست گزاروں نے معمول کے مقررہ وقت سے کہیں زیادہ انتظار کی شکایات بھی کی ہیں۔
