سیئول: جنوبی کوریا کا انچیون انٹرنیشنل ایئرپورٹ 2026 کی پہلی ششماہی میں بین الاقوامی مسافروں کی آمدورفت کے لحاظ سے دنیا کا مصروف ترین ہوائی اڈہ بن گیا ہے۔ ایئرپورٹس کونسل انٹرنیشنل (ACI) کے ابتدائی اعداد و شمار کے مطابق جنوری سے جون 2026 کے دوران انچیون ایئرپورٹ سے 3 کروڑ 83 لاکھ 90 ہزار بین الاقوامی مسافروں نے سفر کیا۔
لندن کا ہیتھرو ایئرپورٹ 3 کروڑ 77 لاکھ 90 ہزار مسافروں کے ساتھ دوسرے جبکہ سنگاپور کا چانگی ایئرپورٹ 3 کروڑ 45 لاکھ 30 ہزار مسافروں کے ساتھ تیسرے نمبر پر رہا۔
انچیون ایئرپورٹ کی بین الاقوامی مسافروں کی تعداد گزشتہ سال کے اسی عرصے کے مقابلے میں 6.3 فیصد بڑھ گئی۔ ایئرپورٹ حکام کے مطابق جنوبی کوریا میں بڑھتی ہوئی سیاحت، بالخصوص چین اور جاپان سے آنے والے مسافروں میں اضافہ، اس ترقی کی اہم وجوہات میں شامل ہے۔
رپورٹ کے مطابق مشرقِ وسطیٰ میں جاری تنازع کے باعث عالمی فضائی سفر کے راستوں میں بھی تبدیلی آئی، جس سے ایشیا کے ذریعے سفر کرنے والے مسافروں اور انچیون کے ٹرانزٹ ٹریفک میں اضافہ ہوا۔ انچیون میں ٹرانسفر مسافروں کی تعداد بھی پہلی ششماہی میں تقریباً 18 فیصد بڑھ کر 42 لاکھ 40 ہزار ہوگئی۔
یہ انچیون ایئرپورٹ کے لیے تاریخی کامیابی ہے، کیونکہ 2001 میں افتتاح کے بعد پہلی مرتبہ اس نے بین الاقوامی مسافروں کی عالمی درجہ بندی میں پہلی پوزیشن حاصل کی ہے۔ تاہم ACI کے اعداد و شمار ابھی ابتدائی ہیں اور حتمی اعداد و شمار بعد میں جاری کیے جائیں گے۔
