پاکستان کی کم عمر ترین کوہ پیما سیلینا خواجہ نے گلیات میں منعقدہ Savage 100 الٹرا ٹریل ریس کی خواتین کیٹیگری جیت کر تاریخ رقم کردی۔ وہ 100 میل کی الٹرا ٹریل ریس مکمل کرنے اور جیتنے والی پہلی پاکستانی خاتون بن گئی ہیں، جبکہ اس اعزاز کے ساتھ وہ اس کارنامے کو انجام دینے والی کم عمر ترین خاتون بھی بن گئیں۔
تین روزہ یہ مقابلہ 28 سے 30 اگست 2026 تک گلیات کے دشوار گزار پہاڑی راستوں پر منعقد ہوا، جس میں مجموعی طور پر 48 رنرز نے حصہ لیا۔ شرکا نے روزانہ تقریباً 40 کلومیٹر کا فاصلہ طے کیا جبکہ ہر مرحلے میں بلندی کا فرق 2 ہزار میٹر سے زائد تھا۔
ریس کا روٹ نملی گلی سے برمی گلی تک تاریخی برائیڈل ٹریک پر تھا اور ہر مرحلہ مکمل کرنے کے لیے 12 گھنٹے کی حد مقرر کی گئی تھی۔ اس چیلنج میں جسمانی برداشت، رفتار، ریکوری اور مسلسل تین دن کارکردگی برقرار رکھنا اہم تھا۔
خواتین کیٹیگری میں عائشہ مستور بٹ نے دوسری جبکہ DRC رننگ کلب کی ایمان خان نے تیسری پوزیشن حاصل کی۔ منتظمین کے مطابق سیلینا نے تینوں دن بہترین کارکردگی کا مظاہرہ کیا اور مجموعی طور پر خواتین میں سرفہرست رہیں۔
مردوں کی کیٹیگری میں جی بی اسکاؤٹس کے یسبان کریم فاتح قرار پائے، جنہوں نے آخری روز 40 کلومیٹر کا مرحلہ 4 گھنٹے 13 منٹ میں مکمل کرکے کورس کا قومی ریکارڈ بھی قائم کیا۔
یہ کامیابی پاکستان میں الٹرا ٹریل رننگ اور ایڈونچر اسپورٹس کے فروغ کے لیے بھی اہم قرار دی جارہی ہے۔ منتظمین کا کہنا ہے کہ گلیات کے قدرتی اور پہاڑی ماحول میں ایسے مقابلوں سے پاکستان کو مستقبل میں بین الاقوامی الٹرا ٹریل رنرز کے لیے ایک اہم مقام بنانے میں مدد مل سکتی ہے۔
