انجینئرز ملکی دفاع سمیت تمام شعبوں میں ریڑھ کی ہڈی ہیں: گورنر سندھ

کراچی (این این آئی) گورنر سندھ نہال ہاشمی
نے کہا ہے کہ انجینئرز ملک کے دفاع سمیت تمام شعبوں میں ریڑھ کی ہڈی کی حیثیت رکھتے ہیں، میزائل اور طیاروں کی تیاری سے لے کر سائبر سکیورٹی، زراعت اور طبی آلات کی تیاری تک انجینئرز ملکی ترقی میں اہم کردار ادا کر رہے ہیں۔ وہ این ای ڈی یونیورسٹی آف انجینئرنگ اینڈ ٹیکنالوجی کے سالانہ جلسہ تقسیم اسناد سے بحیثیت مہمان خصوصی خطاب کر رہے تھے۔ گورنر سندھ نے کہا کہ وزیراعظم میاں شہباز شریف نے انجینئرنگ کے طلبہ کے لیے لیپ ٹاپ سمیت متعدد تعلیمی منصوبے دیئے ہیں۔ انہوں نے کہا کہ ایکسرے، ایم آر آئی اور دیگر طبی آلات کی تیاری میں بھی انجینئرز کا بنیادی کردار ہے، انجینئرز کے بغیر معاشرے کی ترقی کا سفر ادھورا ہے۔ نہال ہاشمی نے کہا کہ آج کا دن فارغ التحصیل طلبہ اور ان کے والدین کے لیے فخر اور خوشی کا موقع ہے کیونکہ ان کے خوابوں کو تعبیر ملی ہے۔ انہوں نے طلبہ کو عملی زندگی میں محنت، لگن اور ملک کی خدمت جاری رکھنے کی تلقین کی۔ جلسہ تقسیم اسناد کے دوران بیچ 2022 کے 2262 طلبہ کو بی ایس اور بی ای کی اسناد جبکہ 881 طلبہ کو ماسٹرز کی اسناد تفویض کی گئیں۔ 34 طلبہ کو پہلی پوزیشن حاصل کرنے پر طلائی تمغوں سے نوازا گیا جبکہ 40 سکالرز کو پی ایچ ڈی کی اسناد دی گئیں۔ قائم مقام وائس چانسلر ڈاکٹر نعمان احمد نے خطبہ استقبالیہ میں بتایا کہ این ای ڈی یونیورسٹی تحقیق اور تعلیم میں جدت کے ساتھ آگے بڑھ رہی ہے۔ یونیورسٹی کی جانب سے تقریباً 590 ملین روپے کی 13 ہزار کے قریب وظائف جاری کیے گئے ہیں جبکہ غیر ملکی جامعات اور عالمی اداروں کے ساتھ اساتذہ کے تبادلے کے پروگرام بھی جاری ہیں۔