کراچی(این این آئی) پاکستان پیپلز پارٹی کے رکن قومی اسمبلی قادر پٹیل نے کہا ہے کہ ایم کیو ایم بدترین ناکامی
کے بعد ایک بار پھر صوبہ کارڈ کھیل رہی ہے، ایم کیو ایم نے جب بھی عوامی حمایت کھوئی، تقسیم اور نئے صوبے کا شوشہ چھوڑا۔ایم کیو ایم رہنما خالد مقبول صدیقی کے بیان پر ردعمل دیتے ہوئے قادر پٹیل نے کہا کہ مصطفی کمال ماضی میں خود خالد مقبول صدیقی کو بھارتی خفیہ ایجنسی ”را” کا ایجنٹ قرار دے چکے ہیں، خالد مقبول صدیقی وضاحت کریں کہ مصطفی کمال اس وقت جھوٹ بول رہے تھے یا آج سچ بول رہے ہیں۔انہوں نے کہا کہ ایم کیو ایم عوام کو نئے صوبوں کا لولی پاپ دینے سے پہلے یہ بھی بتائے کہ بوری بند لاشیں کس کا کلچر تھا اور بھتے کی لالچ میں کراچی کی صنعتیں کس نے تباہ کیں۔قادر پٹیل نے کہا کہ ایم کیو ایم مگرمچھ کے آنسو بہانا بند کرے، پیپلز پارٹی سندھ کے عوام کو تقسیم کرنے کی ہر کوشش کے خلاف جمہوری اور آئینی جدوجہد جاری رکھے گی۔انہوں نے کہا کہ خالد مقبول صدیقی جتنی بار صوبے کا کارڈ کھیلیں گے، عوام اتنی ہی بار ان سے ماضی کا حساب مانگیں گے۔
