DIG آپریشنز فیصل کامران کا اپنے دفترمیں کھلی کچہری کا انعقاد

لاہور (کرائم رپورٹر) ڈی آئی جی آپریشنز فیصل کامران کا روزانہ کی بنیاد پر اپنے دفتر میں کھلی کچہری کا سلسلہ جاری ہے۔ امروز بھی کھلی کچہری میں شہریوں نے بڑی تعداد میں شرکت کی۔ فیصل کامران نے شہریوں کے مسائل سنے اور موقع پر  متعلقہ افسران کو احکامات جاری کئے۔ ڈی آئی جی آپریشنز نے خاتون سائلہ کا کرایہ دار سے 2 ماہ کا کرایہ نہ ملنے اور میٹر اتارنے کی شکایت پر ایس ایچ او غازی آباد کو شواہد کی روشنی میں قانونی کارروائی کا حکم دے دیا۔ اسی طرح بزرگ شہری کی رقم نہ ملنے کی شکایت پر ایس ایچ او نشتر کالونی کو فوری طور پر رقم دلوانے کی ہدایت کی گئی۔ سوتیلے بھائیوں کا وراثتی جائیداد کا حصہ مانگے پر خاتون سائلہ کو جان سے مارنے کی دھمکیوں کی شکایت پر ایس ایچ او راوی روڈ کو سائلہ کو تحفظ فراہم کرنے اور وراثتی جائیداد میں حصہ دلوانے کا حکم دیا گیا۔ فیصل کامران نے شہری کا سابقہ مالک پر مارنے پیٹنے اور چوری کا جھوٹا مقدمہ درج کروانے کا الزام پر ایس ایچ او نولکھا کو حقائق سامنے لانے کی ہدایت کی۔ اسی طرح شہری کی ٹریول ایجنٹ پر باہر بھیجنے کے سلسلے میں 5 لاکھ روپے خرد برد کرنے کی درخواست پر ایس ایچ او شاہدرہ کو بعد از تصدیق مقدمہ درج کرنے کی ہدایت کی گئی۔ ڈی آئی جی آپریشنز نے خاتون سائلہ کا سابقہ مالکن پر جھوٹا چوری کا مقدمہ کروانے کی شکایت پر ایس ایچ او شمالی چھائونی کو حقائق جاننے، انصاف فراہم کرنے کا حکم دیا۔ نجی کوریئر کمپنی کے مالک کا اپنے ملازمین پر 19 لاکھ روپے خرد برد کرنے کی شکایت پر ایس ایچ او ریس کورس کو شواہد کی روشنی میں مقدمہ درج کرنے کا حکم دیا گیا۔ فیصل کامران کا کہنا تھا کہ عوام کو تحفظ اور قانونی رہنمائی فراہم کرنا پولیس کا فرض ہے۔ شہری ہفتہ میں 6 روز اپنی درخواستوں کے سلسلے میں 01 تا03 بجے سہ پہر میرے دفتر تشریف لائیں۔ اتوار کو دوپہر 12 بجے فیس بک لائیو پر بھی شہریوں کی شکایات اور تجاویز سن کر دادرسی کی جا رہی ہے۔