اسلام آباد (این این آئی)وفاقی وزیر پیٹرولیم علی پرویز ملک سے وزیر توانائی خیبرپختونخوا نذیر احمد عباسی نے ملاقات کی جس میں وفاقی و خیبر
پختونخوا کے وزرائے توانائی نے عوامی فلاح کے لیے تعاون مضبوط بنانے پر اتفاق کیا گیا ۔وفاقی وزیر پیٹرولیم علی پرویز ملک نے عالمی منڈی میں تیل کی قیمتوں اور ملکی سپلائی صورتحال پر بریفنگ دی۔ علی پرویز ملک نے کہاکہ خیبر پختونخوا میں تیل و گیس تلاش سرگرمیوں کے تحفظ کے لیے جامع سیکیورٹی پلان پر کام جاری ہے۔وزیر توانائی خیبرپختونخوا نزیر احمد عباسی نے کہاکہ ای اینڈ پی سرگرمیوں کے تحفظ کے لیے صوبائی حکومت مکمل تعاون کرے گی۔ علی پرویز ملک نے کہاکہ وزیراعظم کی ہدایت ہے کہ عوام کی فلاح اور ریاست کے مفاد کے لیے ہر ممکن سہولت فراہم کی جائے۔وزیر توانائی خیبرپختونخوا نے کہاکہ ایل پی جی پالیسی کے تحت پہاڑی علاقوں کے لیے مختص 10 فیصد کوٹے کا مؤثر استعمال پر صوبائی ایل پی جی کمپنی قائم کرنے کی تجویز دی ،خیبر پختونخوا میں تیل و گیس کی تلاش بڑھانے سے صوبائی رائلٹی میں اضافہ ہوگا۔وزیرتوانائی نے کہاکہ خیبر پختونخوا میں کنوؤں کی کامیابی کی شرح عالمی اوسط سے زیادہ ہے۔ علی پرویز ملک نے کہاکہ جنگ کے باعث گیس کی فراہمی دباؤ کا شکار ہے، صورتحال بہتر ہونے پر تقسیم کا جائزہ لیا جائے گا۔ انہوںنے پہاڑی علاقوں کے لیے 10 فیصد ایل پی جی کوٹے کے استعمال کی تجویز دی ۔ علی پرویز ملک نے کہاکہ خیبر پختونخوا کے توانائی مسائل کے حل کے لیے ہر ممکن تعاون فراہم کیا جائے،عوامی فلاح کو سیاست سے بالاتر رکھنا ہوگا۔وزیر توانائی خیبرپختونخوا نذیر احمد عباسی نے کہاکہ مسائل حل کرنے کے لیے مل بیٹھ کر عملی اقدامات کرنا ہوں گے۔
