جی ٹی روڈ گلیانہ موڑ پر خطرناک گڑھے، حادثات کا خدشہ بڑھ گیا

گوجرخان (نمائندہ خبریں) جی ٹی روڈ گلیانہ موڑ کے قریب مختلف پائپ لائنیں بچھانے کے لیے کھودی گئی سڑک ایک ماہ گزرنے کے بعد بھی مرمت نہ ہو سکی۔ سڑک کی ناقص مرمت کے باعث دونوں اطراف گہرے گڑھے بن چکے ہیں جو روزانہ سفر کرنے والے ہزاروں مسافروں اور گاڑیوں کے لیے شدید خطرہ بنے ہوئے ہیں۔  مقامی شہریوں کے مطابق تیز رفتار گاڑیوں کے اچانک ان گڑھوں میں آنے سے متعدد چھوٹے حادثات پیش آ چکے ہیں اور کئی گاڑیاں خراب بھی ہوئی ہیں۔ اگرچہ مقامی ڈرائیور یہاں رفتار کم کر لیتے ہیں، لیکن دیگر شہروں سے آنے والے غیر واقف ڈرائیوروں کے لیے یہ مقام بے حد خطرناک ثابت ہو رہا ہے۔ شہریوں نے متعلقہ حکام اور اربابِ اختیار سے زوردار مطالبہ کیا ہے کہ گلیانہ موڑ کے قریب سڑک کی فوری اور معیاری مرمت کرائی جائے تاکہ کسی بڑے جانی و مالی حادثے سے بچا جا سکے