ایف بی آر سسٹم کی اپ گریڈیشن پر سرمایہ کاری کرے: ٹیکس ایڈوائزرز ایسوسی ایشن

لاہور (این این آئی) پاکستان ٹیکس ایڈوائزرز ایسوسی ایشن کے سینئر ممبر چودھری امانت بشیر نے آئرس سسٹم کی ناکامی کی وجہ سے گوشوارے جمع کرانے والوں کو درپیش مشکلات پر شدید تشویش کا اظہار کرتے ہوئے کہا ہے کہ ایف بی آر کو اپنے سسٹم کی اپ گریڈیشن پر بڑی سرمایہ کاری کرنا ہو گی، ٹیکس نظام کا سارا ڈھانچہ ہی از سر نو ترتیب دینے کی ضرورت ہے تاہم اس منصوبے کو مرحلہ وار آگے بڑھایا جائے۔ ٹیکس بار کے وفد سے ملاقات میں گفتگو کرتے ہوئے انہوں نے کہا کہ ٹیکس دینے والوں کی تعداد ایک سطح پر منجمد اور لوگ رضا کارانہ ٹیکس نیٹ میں کیوں شامل نہیں ہوتے اس بارے سٹڈی رپورٹ تیار کرانے کی ضرورت ہے۔ انہوں نے کہا کہ اگر حقیقت پر مبنی بات کی جائے تو پاکستان کا ٹیکس کا نظام غیر منصفانہ ہے یہی وجہ ہے کہ لوگ ٹیکس دینے کی بجائے چور راستے تلاش کرتے ہیں۔ یہاں کاروبار کرنے والے ہر شخص کو چور سمجھا جاتا ہے جس کی وجہ سے لوگ بد دل ہوتے ہیں۔