موثر رابطہ فوڈ سیفٹی کے بہتر نفاذ میں معاون ثابت ہوگا، چودھری نعیم

راولپنڈی(خصوصی رپورٹر)ریسٹورینٹس، کیٹررز، سویٹس اینڈ بیکرز سے وابستہ تاجر نمائندوں کے وفد نے پنجاب فوڈ اتھارٹی کے نئے تعینات ہونے والے ڈائریکٹر نارتھ اعجاز احمد سے ملاقات کی اور انہیں نئی ذمہ داریاں سنبھالنے پر مبارکباد پیش کی۔وفد کی قیادت چودھری محمد نعیم نے کی جبکہ وفد میں ایسوسی ایشن کے صدر چودھری فاروق، چیئرمین حاجی ممتاز احمد، چودھری زاہد اور دیگر عہدیداران شامل تھے۔ اس موقع پر چودھری محمد نعیم نے اعجاز احمد کو گلدستہ بھی پیش کیا۔ملاقات کے دوران فوڈ سیفٹی اقدامات، ریسٹورینٹس، کیٹررز، سویٹس اور بیکریز سے وابستہ کاروباری افراد کو درپیش مسائل اور ان کے حل سمیت مختلف امور پر تبادلہ خیال کیا گیا۔چودھری محمد نعیم نے کہا کہ شہریوں کو معیاری اور محفوظ خوراک کی فراہمی مشترکہ ذمہ داری ہے، اس مقصد کے لیے پنجاب فوڈ اتھارٹی اور کاروباری برادری کے درمیان مثر رابطہ ضروری ہے۔ انہوں نے کہا کہ تاجر برادری فوڈ سیفٹی کے حوالے سے مثبت اقدامات میں اتھارٹی کے ساتھ مکمل تعاون کرے گی۔انہوں نے کہا کہ متعلقہ کاروباری شعبوں سے وابستہ افراد فوڈ سیفٹی اصولوں پر عملدرآمد کے لیے تیار ہیں، تاہم تاجروں کو درپیش حقیقی مسائل کو باہمی مشاورت سے حل کیا جانا چاہیے۔اس موقع پر ڈائریکٹر نارتھ اعجاز احمد نے وفد کا شکریہ ادا کیا اور تاجروں کے مسائل سنے۔ انہوں نے کہا کہ فوڈ سیفٹی کے اہداف کے حصول کے ساتھ کاروباری برادری کے ساتھ مثر رابطے اور تعاون کو بھی اہمیت دی جائے گی۔وفد نے پنجاب فوڈ اتھارٹی کے ساتھ آئندہ بھی مکمل تعاون جاری رکھنے کی یقین دہانی کرائی۔