ڈی آئی جی آپریشنز فیصل کامران کا فیس بک پر لائیو کھلی کچہری کا انعقاد

لاہور(کرائم رپورٹر)ڈی آئی جی آپریشنز فیصل کامران نے فیس بک لائیو پر کھلی کچہری کا انعقاد کیا۔ کھلی کچہری میں ہزاروں شہریوں نے شرکت کی۔ کھلی کچہری میں لاہور سمیت دیگر اضلاع اور مختلف ممالک سے بھی شہریوں کی فون کالز موصول ہوئیں۔ڈی آئی جی آپریشنز نے کہا کہ لاہور پولیس جرائم کے ساتھ جانوروں کے تحفظ کے لیے بھی متحرک ہے۔پولیس اینیمل ریسکیو سنٹر نے 2023 سے اب تک 2542 جانور ریسکیو کیے۔ فیصل کامران نے کہا کہ فریکچر ٹانگ والے شیر کے بچے کو ریسکیو کرکے علاج بعد ازاں وائلڈ لائف کے حوالے کیا گیا۔انہو ں نے کہا کہ جانوروں پر تشدد اور انہیں لڑوانا جرم ہے۔ ڈی آئی جی آپریشنز نے کہا کہ جانوروں پر جوا کھیلنے والوں کے خلاف بھی قانونی کارروائی کی جاتی ہے۔جانوروں پر ظلم دیکھیں تو پولیس اینیمل ریسکیو سنٹر کو اطلاع دیں۔ ڈی آئی جی آپریشنز نے کہا کہ ناکوں پر ہراساں کیے جانے کی شکایت 15 پر درج کرائیں اور شہری خاموش نہ رہیں۔انہوں نے کہا کہ خواتین اور بچوں کے خلاف جرائم پر فوری کارروائی کی جاتی ہے۔شہریوں نے ڈی آئی جی آپریشنز کی سود خوری کے خلاف جاری کارروائیوں کو سراہا۔دریں اثنا لاہور پولیس آپریشنز ونگ نے MDCAT امتحانات کے دوران فول پروف سکیورٹی انتظامات کیے۔ ڈی آئی جی آپریشنزفیصل کامران نے لاہورکے مختلف امتحانی مراکز کا دورہ کیا۔فیصل کامران نے سیکیورٹی انتظامات اور اہلکاروں کی ڈیوٹیز کا تفصیلی جائزہ لیا۔انہوں نے امتحانی مراکز کے داخلی و خارجی راستوں، پارکنگ ایریاز کی سکیورٹی بھی چیک کی۔فیصل کامران نے امتحانی ہالز کے اطراف تعینات اہلکاروں کی ڈیوٹی کا بھی جائزہ لیا۔انہوں نے لارنس روڈ امتحانی مرکز کی سکیورٹی چیک کی۔اسی طرح فیصل کامران نے لاہور کالج فار ویمن یونیورسٹی، جیل روڈ کا بھی دورہ کیا۔ اس موقع پر ڈی آئی جی آپریشنز نے کہا کہ خواتین امیدواروں کی سہولت کے لیے لیڈی پولیس اہلکار بھی تعینات ہیں۔ علاوہ ازیں ڈی آئی جی آپریشنز فیصل کامران نے شہر کے مختلف گرجا گھروں کا دورہ کیا۔ فیصل کامران نے کیتھولک چرچ مال روڈ،چرچ آف پاکستان ڈایوسِس نیلا گنبد اور نولکھا میں موجود گرجا گھروں کے سیکیورٹی انتظامات کا جائزہ لیا۔ ڈی آئی جی آپریشنز نے چرچز انتظامیہ سے ملاقات اوران کے ساتھ سکیورٹی کے بارے میں تبادلہ خیال کیا۔ ڈی آئی جی آپریشنز نے موقع پر پولیس جوانوں کو ضروری ہدایات جاری کیں۔ انہوں نے عبادت گاہوں کے اردگرد گشت اور ناکہ بندی مزید مثر بنانے پر زور دیا۔ ڈی آئی جی آپریشنز نے داخلی و خارجی راستوں کی چیکنگ اور نگرانی سخت کرنے کی ہدایت کی۔ انہوں نے کہا کہ امن و امان کے قیام کے لیے پولیس ہر وقت چوکس ہے۔