او آئی سی رابطہ گروپ برائے جموں و کشمیرکے مجوزہ اجلاس میں امور کشمیر پرتبادلہ خیال ہوگا

اسلام آباد (این این آئی) یونائیٹڈ مشن پاکستان کی جانب سے ستمبر 2026ء میں امریکہ میں او آئی سی کے رابطہ گروپ برائے جموں و کشمیر کے اجلاس کا اہتمام کیا جا رہا ہے جس میں مقبوضہ جموں و کشمیر کی موجودہ صورتحال، کشمیری عوام کے بنیادی حقوق اور مسئلہ جموں و کشمیر سے متعلق اہم امور پر تبادلہ خیال کیا جائے گا۔ کشمیر میڈیا سروس کے مطابق اس سلسلے میں مشن نے کل جماعتی حریت کانفرنس کی سینئر رہنما شمیم شال کو اجلاس میں شرکت کے لیے امریکہ آنے کی دعوت دی ہے۔ شمیم شال اجلاس میں مقبوضہ جموں و کشمیر کی صورتحال، کشمیری عوام کو درپیش مشکلات، انسانی حقوق کی خلاف ورزیوں اور مسئلہ کشمیر کے منصفانہ اور پرامن حل کے حوالے سے بریفنگ دیںگی۔ اجلاس میں مقبوضہ جموں و کشمیر کی تازہ صورتحال کو عالمی برادری کے سامنے اجاگر کرنے، کشمیری عوام کے جائز حقوق اور مسئلہ کشمیر کے حل کے لیے بین الاقوامی سطح پر جاری سفارتی کوششوں کے حوالے سے بھی تبادلہ خیال کیا جائے گا۔