ایم ایل ومنصوبے کیلئے 10 سال انتظار کے بعد متبادل فنانسنگ کی تلاش

اسلام آباد ( حبہ عباسی)سی پیک کا سب سے بڑا ریلوے منصوبہ، اربوں ڈالر کی لاگت، ایک دہائی  کا انتظار اور اب نیا انکشاف۔ ایم ایل ون منصوبہ جسے کبھی پاک چین اقتصادی تعاون کی ریڑھ کی ہڈی قرار دیا گیا تھا، وہ دس سال گزرنے کے باوجود مکمل نہ ہو سکا۔ پارلیمانی کمیٹی کے اجلاس میں خود ریلوے حکام نے اعتراف کیا کہ 2014 سے سی پیک فریم ورک میں شامل منصوبے کے لیے "دس سال انتظار کیا، کچھ نہیں ملا”، جس کے بعد حکومت کو متبادل فنانسنگ کی تلاش کا راستہ اختیار کرنا پڑا۔قومی اسمبلی کی قائمہ کمیٹی برائے اقتصادی امور کے اجلاس میں کراچی کے اہم منصوبوں میں تاخیر پر سخت سوالات اٹھائے گئے۔ چیئرمین کمیٹی مرزا اختیار بیگ نے ایم نائن، ایم سکس موٹروے، لیاری مال بردار بائی پاس اور دیگر منصوبوں میں تاخیر کو ناقابل قبول قرار دیتے ہوئے خصوصی ذیلی کمیٹی تشکیل دے دی۔اجلاس میں بتایا گیا کہ ایم ایل ون منصوبے کی مجموعی لاگت 9.8 ارب ڈالر سے کم کر کے تقریباً 6 ارب ڈالر تک لانے کا دعویٰ کیا جا رہا ہے جبکہ کراچی سے روہڑی تک پہلے سیکشن پر 2 ارب ڈالر خرچ ہوں گے۔ حکام کے مطابق اب چین کے بجائے ایشیائی ترقیاتی بینک سمیت پانچ بین الاقوامی مالیاتی شراکت داروں سے فنڈنگ حاصل کرنے کی کوشش کی جا رہی ہے۔ریلوے حکام نے مزید بتایا کہ منصوبہ نئی ریلوے لائن نہیں بلکہ موجودہ ٹریک کی اپ گریڈیشن ہے، جس کے بعد ٹرینوں کی رفتار 105 کلومیٹر فی گھنٹہ سے بڑھا کر 160 کلومیٹر فی گھنٹہ کی جائے گی۔ کمیٹی ارکان نے سوال اٹھایا کہ اگر منصوبہ اتنا اہم تھا تو ایک دہائی تک پیش رفت کیوں نہ ہو سکی اور فنانسنگ کا ماڈل بار بار کیوں تبدیل ہوتا رہا۔کمیٹی نے کراچی کے پانی کے منصوبوں اور کے فور سمیت تمام بڑے ترقیاتی منصوبوں کا جائزہ لینے کے لیے کراچی میں خصوصی اجلاس بلانے کا فیصلہ کیا ہے، جہاں منصوبوں میں تاخیر، لاگت میں اضافے اور رکاوٹوں کی نشاندہی کی جائے گی۔ سوال اب یہ ہے کہ دس سال بعد بھی اگر منصوبے کاغذوں اور فنانسنگ کے مرحلے میں ہیں تو ترقی کی رفتار کس ٹریک پر چل رہی ہے؟۔
ایم ایل ون منصوبہ