ڈبلیو ایچ او کا پاکستان پر عالمی سفری پابندیاں برقرار رکھنے کا فیصلہ

اسلام آباد (آئی این پی) عالمی ادارہ صحت (ڈبلیو ایچ او) نے پاکستان پر عالمی سفری پابندیاں برقرار رکھنے کا فیصلہ کرتے ہوئے پابندیوں میں تین ماہ کی توسیع کر دی۔ رپورٹ کے مطابق پابندیوں کی سفارش ڈبلیو ایچ او ایمرجنسی کمیٹی برائے پولیو نے کی۔ صحت کے عالمی ادارے کا کہنا ہے کہ کمیٹی نے پاکستان میں پولیو کی صورتحال اور حکومتی اقدامات پر غور کیا، پاکستان اور افغانستان میں وائلڈ پولیو وائرس کا پھیلائو تاحال قابل تشویش ہے۔ ڈبلیو ایچ او کا کہنا ہے کہ پولیو وائرس کا پھیلائو عالمی صحت عامہ کے لئے بدستور خطرہ ہے جبکہ پاکستان اور افغانستان پولیو کے حوالے سے ایک دوسرے کے لیے خطرہ بنے ہوئے ہیں۔ عالمی ادارہ صحت کے مطابق رواں سال دنیا بھر سے16 پولیو کیسز رپورٹ ہوئے ہیں جبکہ رواں سال پاکستان میں57 سیوریج سیمپلز پولیو پازیٹو نکلے ہیں اور پاک افغان سرحدی آمدورفت سے پولیو وائرس کی منتقلی جاری ہے۔ ڈبلیو ایچ او کے اعلامیے کے مطابق پاک، افغان پولیو وائرس منتقلی جنوبی کے پی اور کوئٹہ بلاک سے ہو رہی ہے، جنوبی خیبر پختونخوا اور کراچی میں پولیو وائرس کا مقامی پھیلا جاری ہے، کراچی پولیو وائرس کے پھیلائوکا مرکزی گڑھ بن چکا ہے۔ عالمی ادارے کا کہنا ہے کہ وسطی پاکستان بلاک، جنوبی کے پی، کوئٹہ بلاک میں پولیو مہم چلانے کی ضرورت ہے اور ادارے کو پاکستان میں پولیو ویکسین سے محروم بچوں کے حوالے سے تشویش ہے، ویکسین سے انکار انسداد پولیو کی راہ میں رکاوٹ بنی ہوئی ہے اور سکیورٹی مسائل پر کے پی میں ڈھائی لاکھ بچے پولیو ویکسین سے محروم ہیں۔