مستند معلومات تک رسائی ہر شہری کا بنیادی حق ہے: گورنر سندھ

کراچی (این این آئی) گورنر سندھ سید محمد نہال ہاشمی نے عالمی یومِ معلومات تک رسائی کے موقع پر اپنے پیغام میں کہا ہے کہ مستند اور بروقت معلومات تک رسائی ہر شہری کا بنیادی حق ہے، جبکہ معلومات تک آسان اور مساوی رسائی شفاف اور جوابدہ طرز حکمرانی کے لیے ناگزیر ہے۔انہوں نے کہا کہ ڈیجیٹل دور میں درست معلومات تک رسائی کے ساتھ ساتھ ان کی صحت، ساکھ اور صداقت کو یقینی بنانا بھی ضروری ہے۔ جعلی اور گمراہ کن معلومات کے پھیلاؤ کی روک تھام کے لیے عوام میں ذرائع ابلاغ اور معلوماتی شعور اجاگر کرنا ہوگا۔گورنر سندھ نے کہا کہ سرکاری اداروں کی جانب سے عوام کو درست، بروقت اور قابل اعتماد معلومات کی فراہمی حکومت کی ترجیحات میں شامل ہے۔ مستند معلومات عوام کو باخبر فیصلے کرنے اور معاشرے میں مؤثر کردار ادا کرنے کے قابل بناتی ہیں۔انہوں نے کہا کہ آزاد، ذمہ دار اور معیاری صحافت عوام تک مستند معلومات پہنچانے میں کلیدی کردار ادا کرتی ہے، جبکہ معلومات تک عالمی رسائی شفافیت، احتساب، آزادی اظہار اور پائیدار ترقی کے فروغ کی بنیاد ہے۔