ٹانک، اسلام آباد(نیوز ایجنسیاں)ڈیرہ اسماعیل خان میں سکیورٹی فورسز کے آپریشن کے دوران 4 دہشت گرد جہنم واصل ہوگئے جبکہ ٹانک میں دہشت گردوں کی ٹریفک پولیس موبائل پر فائرنگ کے نتیجے میں 3 اہلکار شہید جبکہ اے ایس آئی اور 2 راہ گیر زخمی ہوگئے۔ وفاقی وزیرداخلہ محسن نقوی نے ٹریفک پولیس گاڑی پر فائرنگ کے واقعہ کی مذمت کرتے ہوئے کہاہے کہ دہشت گردی کے خلاف جنگ میں شہدا کی لازوال قربانیاں رائیگاں نہیں جائیں گی۔عزم استحکام ویژن کے تحت سکیورٹی فورسز کی خیبرپختونخوا میں دہشت گردوں کے خلاف موثر کارروائیاں جاری ہیں۔سکیورٹی ذرائع کے مطابق ڈیرہ اسماعیل خان میں انٹیلی جنس بیسڈ آپریشن کے دوران فتنہ الخوارج کے 4دہشت گرد ہلاک کر دیئے گئے۔سکیورٹی ذرائع نے بتایا کہ سکیورٹی فورسز نے انٹیلی جنس بنیادوں پر دہشت گردوں کی نقل و حرکت پر کڑی نظر رکھتے ہوئے انہیں کامیابی سے نشانہ بنایا۔ہلاک ہونے والے خارجی دہشت گردوں سے بھاری مقدار میں اسلحہ و گولہ بارود اور افغانی کرنسی بھی برآمد ہوئی۔سکیورٹی فورسز ملک سے دہشت گردی کے ناسور کے مکمل خاتمے اور پائیدار امن کے قیام کیلئے پرعزم ہیں۔ادھر ٹانک میں دہشت گردوں کی ٹریفک پولیس موبائل پر فائرنگ کے نتیجے میں 3 اہلکار شہید جبکہ اے ایس آئی اور 2 راہ گیر زخمی ہوگئے۔ ڈی پی او عبدالصمد خان کے مطابق فائرنگ کا واقعہ ٹانک کے وزیر آباد بازار میں پیش آیا جہاں مسلح ملزمان نے ٹریفک اہلکاروں کی موبائل پر فائرنگ کی جس سے گاڑی میں سوار تین اہلکار موقع پر ہی شہید ہوگئے جب ہ ملزمان فرار ہوگئے۔ڈی پی او کے مطابق دہشت گرد ٹریفک پولیس موبائل بھی لے گئے تھے جسے بعدازاں گرہ بڈھا سے برآمد کیا گیا اس کے علاوہ ملزمان کی فائرنگ سے 2 راہ گیر بھی زخمی ہوئے۔ڈی پی او نے بتایا کہ ملزمان کی گرفتاری کے لیے تمام شاہراہوں اور پیدل راستوں کی ناکہ بندی کردی گئی ہے۔ڈی پی او کے مطابق مسلح ملزمان کی فائرنگ سے اے ایس آئی عصمت اللہ زخمی ہوئے جنہیں فوری طبی امداد کے لیے ڈسٹرکٹ ہیڈکوارٹر ہسپتال منتقل کردیا گیا ہے۔دریں اثناء وفاقی وزیرداخلہ محسن نقوی نے ٹانک کے علاقے میں خوارجیوں کی جانب سے ٹریفک پولیس گاڑی پر فائرنگ کے واقعہ کی مذمت کرتے ہوئے کہاہے کہ دہشتگردی کے خلاف جنگ میں شہدا کی لازوال قربانیاں رائیگاں نہیں جائیں گی۔ اپنے بیان میںوزیرداخلہ محسن نقوی نے فائرنگ سے 3 اہلکاروں کی شہادت پر اظہار افسوس اور شہدا کے لواحقین سے دلی ہمدردی و اظہار تعزیت کیا ۔انہوںنے کہاکہ شہید اہلکاروں کی قربانی کو سلام پیش کرتے ہیں،دکھ کی گھڑی میں شہدا کے لواحقین کے ساتھ کھڑے ہیں۔ محسن نقوی نے کہاکہ دہشتگردی کے خلاف جنگ میں شہدا کی لازوال قربانیاں رائیگاں نہیں جائیں گی۔
اہلکار شہید
