مستحق طبقات کو سہولیات فراہمی کیلئے کوشش کی جائے: اسحاق ڈار

اسلام آباد(ویب ڈیسک)نائب وزیراعظم و وزیر خارجہ اسحاق ڈار نے کہا کہ مستحق طبقات کو سہولتوں کی فراہمی کیلئے بھرپور کوشش کیجائے۔نائب وزیراعظم اسحاق ڈار کی صدارت میں فیول سبسڈی سکیم پر مشترکہ اجلاس ہوا جس میں وزیراعظم فیول ریلیف سکیم پر نیشنل سٹیئرنگ کمیٹی اور میڈیا مینجمنٹ کمیٹی کی کارکردگی کا جائزہ لیا گیا۔اسحاق ڈار نے کہا کہ متعلقہ وزارتوں کے درمیان روابط اور دستیاب وسائل کے موثر استعمال کو یقینی بنایا جائے۔اجلاس میں تمام صوبائی حکومتوں، آزاد کشمیر اور گلگت بلتستان کی حکومتوں کی تجاویز اور تعاون کو سراہا گیا۔اجلاس میں وزیر آئی ٹی، وزیر ماحولیاتی تبدیلی اور وزیر پٹرولیم نے شرکت کی، جبکہ وزیر مملکت برائے خزانہ، وزیراعظم کے معاون خصوصی اور متعلقہ وزارتوں کے اعلی حکام بھی شریک ہوئے۔ دریں اثناء پاکستان اور ویٹیکن نے بین المذاہب ہم آہنگی، باہمی احترام اور پرامن بقائے باہمی کے فروغ کے ساتھ ساتھ سفارتی تعلقات مزید مستحکم بنانے کے عزم کا اعادہ کیا ہے۔ سینیٹر اسحاق ڈار اور ہولی سی کے سیکرٹری برائے تعلقاتِ ریاست آرچ بشپ پال رچرڈ گلاگر کے درمیان ملاقات میں مکالمے، علاقائی و عالمی امن اور مختلف مذاہب کے درمیان افہام و تفہیم کے فروغ پر تبادلہ خیال کیا گیا۔