اے این ایف کا منشیات سمگلنگ کیخلاف کریک ڈائون ،6ملزمان گرفتار

لاہور (کرائم رپورٹر) اینٹی نارکوٹکس فورس کی جانب سے تعلیمی اداروں کے اطراف اور ملک کے مختلف شہروں میں منشیات سمگلنگ کے خلاف کریک ڈائون جاری ہے، 8 کاروائیوں کے دوران 6 ملزمان گرفتار کر کے 1کروڑ سے زائد مالیت کی 91.24 کلوگرام منشیات برآمد کر لی گئی۔ ترجمان اے این ایف کے مطابق کراچی میں یونیورسٹی کے قریب ملزم کے قبضے سے 1.2کلوگرام چرس برآمد، ڈی ایچ اے کراچی کے قریب ملزم کے قبضے سے 750گرام چرس برآمد ہوئی ، گرفتار ملزمان نے تعلیمی اداروں کے طلباء کو منشیات فروخت کرنے کا اعتراف کیا۔ دیگر کاروائیوں میں موٹر وے ٹول پلازہ راولپنڈی کے قریب گاڑی سے 66کلوگرام چرس برآمد کر کے ملزم گرفتار ، حیدرآباد ٹول پلازہ کے قریب گاڑی سے 12کلوگرام چرس برآمد، سیالکوٹ کے قریب موٹر سائیکل سوار ملزم سے 6.75کلوگرام آئس، 2.4کلوگرام چرس،190گرام ہیروئن برآمد ، سرگودھا بس ٹرمینل کے قریب ملزم کے قبضے سے 1.5کلوگرام چرس،1کلوگرام آئس برآمد ، جی ٹی روڈ راولپنڈی کے قریب ملزم کے قبضے سے 450گرام ویڈ برآمد اور رنگ روڈ پشاور کوریئر آفس میں سبمرسیبل پمپ سے 200گرام وزنی 317 ایکسٹیسی گولیاں برآمد ہوئیں ۔ کاروائیوں کے خلاف انسداد منشیات ایکٹ 1997ء کے تحت مقدمات درج کر کے تحقیقات کا آغاز کر دیا گیا ہے۔