ہزاروں خالی آسا میا ں مستقل ختم سرکاری محکموں میں عارضی بھرتیاں کر کے نظام چلایا جانے لگا

ملتان (رپورٹ:رفاقت انجم )ملک میں بے روزگاری کی شرح میں خطرناک اضافہ۔مستقل
سرکاری ملازمتیں تعلیم یافتہ نوجوانوں کے لئے خواب بن گئیں۔مختلف وفاقی و صوبائی محکمے انٹرن شپ پروگرام کے ذریعے عارضی بھرتیاں کرکے دفاتر کے انتظامی امور چلانے لگے ہیں۔ پنجاب حکومت نے سرکاری خزانے پر بوجھ کم کرنے اور اخراجات میں کمی لانے کے لیے محکمہ سکول ایجوکیشن پنجاب میں گریڈ ایک تا 16 کی 30,391 خالی آسامیاں مستقل طور پر ختم کی ہیں۔ مستقل آسامیاں ختم ہونے سے سرکاری تعلیمی ادارے اساتذہ کی کمی کا شکار ہوگئے تو محکمہ تعلیم نے حکومت سے عارضی بھرتی کے لئے انٹرن شپ پروگرام کی منظوری حاصل کرلی جس کا آغاز رواں ماہ سے کرتے ہوئے 16 اکتوبر تک سکول ٹیچر انٹرنیز کے لئے درخواستیں طلب کر لی ہیں۔ ان انٹرنز کو پرائمری، ایلیمنٹری، ہائی اور ہائر سیکنڈری سکولوں میں 38,000 سے 45,000 روپے ماہانہ وظیفے پر رکھا جا رہا ہے۔ یہ بھرتیاں مکمل طور پر عارضی (نومبر 2026 سے مئی 2027 تک ہوں گی اور ان کے اختتام پر صرف سرٹیفکیٹ دیا جائے گا، مستقل نہیں کیا جائے گا۔محکمہ تعلیم ہی میں درجہ چہارم کی 1,139 اور سکول گارڈز کی 351 مستقل ملازمتیں بھی ختم کرکے ختم شدہ آسامیوں کے متبادل کے طور پر 1,490 نئے سکول گارڈز کی لمپ سم پے پیکیج پر کنٹریکٹ پرملازمین بھرتی کا فیصلہ کیا گیا ہے۔ وزیراعلیٰ پنجاب تعلیمی منصوبے کے تحت پہلے مرحلہ میں مانیٹرنگ کے لیے لاہور سمیت جنوبی پنجاب کے مختلف اضلاع بہاولنگر، ڈی جی خان، مظفر گڑھ، راجن پور میں 52 انٹرن شپ کنٹریکٹ آسامیاں متعارف کرائی گئی ہیں جو 8 سے 11 ماہ کے کنٹریکٹ پر مبنی ہیں۔اس کے علاوہ پنجاب میں محکمہ زراعت، محکمہ آئی ٹی اور محکمہ ماحولیات میں بھی ملازمین کی کمی پوری کرنے کے لئے انٹرن شپ پروگرام کے تحت عارضی مدت کے لئے ملازمین بھرتی کئے جا رہے ہیں۔ چیف منسٹر آئی ٹی انٹرن شپ پروگرام کے تحت 2,000 آئی ٹی گریجویٹس کو بھرتی کیا جا رہا ہے۔آئی ٹی انٹرنیز کا ماہانہ وظیفہ 50,000 روپے اور مدت ملازمت 4 سے 5 ماہ مقرر کی گئی ہے۔وزیر اعلیٰ پنجاب زرعی گریجویٹس انٹرن شپ پروگرام کے تحت پہلے مرحلہ میں 1,500 زرعی گریجویٹس کو عارضی مدت کے لئے بھرتی کیا جا رہا ہے۔انہیں بطور فیلڈ اسسٹنٹ سموگ کنٹرول پروگرامز میں ڈیوٹیاں سونپی جائیں گی۔اس انٹرن شپ ملازمت کا ماہانہ وظیفہ 70,000 روپے مقرر کیا گیا ہے۔ کلائمیٹ لیڈرشپ ڈویلپمنٹ انٹرن شپ پروگرام کے تحت مجموعی طور پر 1,250 انٹرنیزکی آن بورڈنگ جاری ہے جنہیں محکمہ تحفظِ ماحول و موسمیاتی تبدیلی میں فیلڈ ڈیوٹیاں سونپی جائیں گی جس کا ماہانہ وظیفہ 60,000 روپے مقرر کیا گیا ہے اور اس انٹرن شپ ملازمت کی مدت صرف 3 ماہ رکھی گئی ہے۔ پنجاب یوتھ کیریئر پروگرام میں ٹیکنیکل، فنانس، آئی ٹی، پروکیورمنٹ اور لیگل سمیت 9 مختلف شعبوں میں انٹرنیز کی بھرتی کے لیے درخواستیں طلب کی گئی ہیں۔ چیف منسٹر انٹرن شپ پروگرام کے تحت 6 ہزار بیروزگار نوجوانوں کی عارضی بھرتی کی جاری ہے جس کا ماہانہ وظیفہ 25,000 روپے مقرر ہے۔ وفاقی سطح پر بھی مختلف وزارتیں اور خودمختار ادارے بھی انٹرنیز بھرتی کر رہے ہیں۔ پرائم منسٹر ڈیجیٹل یوتھ ہب۔وزیر اعظم یوتھ پروگرام کے تحت ملک بھر کے گریجویٹس کے لیے مختلف ‘ورک فار سکلز انٹرن شپس مرحلہ وار فراہم کیے جا رہے ہیں، جن میں 25,000 سے 40,000 روپے تک کا ماہانہ وظیفہ شامل ہے۔
عارضی بھرتی