راولپنڈی(سٹی رپورٹر)وزیراعلی پنجاب مریم نواز شریف کے شفاف اور منصفانہ امتحانی نظام کے عزم اور صوبائی وزیر تعلیم رانا سکندر حیات کی امتحانی نظم و ضبط اور قواعد پر سختی سے عملدرآمد کی ہدایات کے تحت تعلیمی بورڈ راولپنڈی میں میٹرک دوسرا سالانہ امتحان 2026 کے دوران نگرانی کا عمل موثر انداز میں جاری ہے۔ امتحانی نظام میں شفافیت، میرٹ کی بالادستی اور تمام امیدواروں کو یکساں مواقع کی فراہمی یقینی بنانے کیلئے خصوصی اقدامات کیے جا رہے ہیں۔چیئرمین تعلیمی بورڈ راولپنڈی پروفیسر ڈاکٹر اقبال محمود نے امتحانی مراکز کی مسلسل نگرانی اور امیدواروں کو پرسکون، منظم اور منصفانہ ماحول فراہم کرنے کی ہدایت کی ہے۔ انہوں نے اس امر پر زور دیا کہ امتحانی قواعد کی پابندی ہر صورت یقینی بنائی جائے اور کسی بھی خلاف ورزی کی صورت میں مقررہ ضابطے کے مطابق کارروائی عمل میں لائی جائے۔کنٹرولر امتحانات تنویر اصغر اعوان نے میٹرک دوسرے سالانہ امتحان 2026 کے سلسلے میں مختلف امتحانی مراکز کے دورے کیے اور امتحانی انتظامات، عملے کی حاضری اور امتحانی قواعد پر عملدرآمد کا جائزہ لیا۔تفصیلات کے مطابق امتحانی مرکز گورنمنٹ گریجویٹ کالج اٹک سے دو امیدوار رولنمبر 205991،200030 نقل کرتے ہوئے رنگے ہاتھوں پکڑے گئے۔ دونوں امیدواروں کیخلاف کیس رجسٹر ڈ کر کے ڈسپلن برانچ کو بھجوا دیے گئے۔تعلیمی بورڈ راولپنڈی کی انتظامیہ امتحانی شفافیت، میرٹ اور نظم و ضبط برقرار رکھنے کیلئے پرعزم ہے، تاکہ ہر امیدوار کو اپنی محنت اور قابلیت کی بنیاد پر کامیابی حاصل کرنے کے یکساں مواقع فراہم کیے جا سکیں۔
