پی پی پاکستان کی سب سے بڑی جمہوری قوت ہے: سردار اشعر حیات

فتح جنگ (بیورو رپورٹ)پاکستان پیپلز پارٹی راولپنڈی ڈویژن کے صدر سردار اشعر حیات خان نے کہا ہے کہ پیپلز پارٹی پاکستان کی سب سے بڑی جمہوری اور عوامی سیاسی قوت ہے جس نے ہمیشہ آمریت کے خلاف اور عوام کے حقوق کی بحالی کے لیے تاریخی جدوجہد کی ہے۔ پارٹی کی قیادت ملک بھر میں عوامی ترقی اور جمہوریت کی ضمانت ہے۔ان خیالات کا اظہار انھوں نے پریس کلب فتح جنگ میں ایک پریس کانفرنس سے خطاب کرتے ہوئے کیا۔ اس موقع پر پیپلز پارٹی کے سابق امیدوار قومی اسمبلی خرم شہزاد خان ،ممبر پنجاب ایگزیکٹو محمد ایوب خان ،ضلعی سینئر نائب صدر سردار ظہیر خان کھٹڑ،سیکرٹری انفارمیشن بیورو طارق محمود قادری حاجی خضر حیات سمیت مقامی رہنما اور کارکنان بھی موجود تھے پریس کانفرنس سے خطاب کرتے ہوئے سردار اشعر حیات خان نے کہا کہ چیٔرمین بلاول بھٹو زرداری کی ولولہ انگیز اور صدرِ مملکت آصف علی زرداری کی مدبرانہ و بصیرت افروز سیاست کی بدولت پیپلز پارٹی اس وقت چاروں صوبوں بشمول آزاد کشمیر اور گلگت بلتستان میں یکساں طور پر مقبول اور فعال سیاسی جماعت بن چکی ہے۔انھوں نے کہا کہ پنجاب پیپلز پارٹی کا روایتی قلعہ رہا ہے اور صوبے میں پارٹی کو ازسرِنو منظم کیا جا رہا ہے۔ پنجاب میں تنظیم سازی کے عمل کو تیز کر دیا گیا ہے اور جلد ہی خطے کی بھاری بھرکم اور سیاسی طور پر اثر و رسوخ رکھنے والی شخصیات پیپلز پارٹی میں شمولیت اختیار کریں گی۔ ان شاء اللہ آنے والے عام انتخابات میں پیپلز پارٹی پنجاب بھر سے بھرپور انداز میں سیاسی "کم بیک” کرے گی اور عوام کے اعتماد سے کامیابی حاصل کرے گی۔سردار اشعر حیات خان نے مزید کہا کہ پیپلز پارٹی نے ہر دور میں غریب، مزدور اور عام آدمی کے حقوق کی بات کی ہے اور آئندہ بھی ملک کو درپیش سیاسی و معاشی چیلنجز سے نکالنے کی صلاحیت صرف پیپلز پارٹی کی قیادت کے پاس ہی ہے۔