راولپنڈی(خصوصی رپورٹر)تھانہ سول لائن کے مشہور حنا جاوید قتل کیس میں مقتولہ کی ڈی این اے رپورٹ تفتیشی ٹیم کو موصول ہوگئی ذرائع کے مطابق پنجاب حکومت کی تشکیل کردہ ہائی پاورڈ کمیٹی
نے ڈی این اے رپورٹ کا جائزہ لیا جبکہ کمیٹی نے مقتولہ کے اہلخانہ سے پولیس لائن ہیڈکوارٹر میں تفصیلی ملاقات بھی کی ایڈیشنل آئی جی سی سی ڈی سہیل ظفر چٹھہ اور ایس ایس پی انویسٹیگیشن سیف اللہ سے مقتولہ کے بھائی فہد جاوید، وکیل شاہ خاور اور دیگر اہل خانہ نے تحقیقاتی کمیٹی سے ملاقات کی ذرائع کے مطابق کمیٹی نے ڈی این اے رپورٹ کی تفصیلات اہلخانہ کے ساتھ شیئر کردیں جبکہ حنا جاوید کے اہلخانہ نے ہائی پاورڈ کمیٹی کے سامنے اپنے تحفظات رکھ دیئے تاہم کمیٹی کو اس قتل کیس کی دیگر فرانزک رپورٹس کا انتظار ہے۔ فرانزک رپورٹس ملنے کے بعد چالان عدالت میں پیش کیا جائے گا۔ ذرائع کا کہنا ہے کہ حنا جاوید قتل کیس کی تفتیشی ٹیم میں ہوموسائیڈ انویسٹیگیشن یونٹ کے انسپکٹر افتخار احمد کو بھی شامل کیا گیا ہے گزشتہ روز کی ملاقات میں ایڈیشنل آئی جی سہیل ظفر چٹھہ نے اہلخانہ کو غیر جانبدار اور شفاف تحقیقات کے ساتھ دیگر فرانزک رپورٹس جلد حاصل کرنے کی بھی یقین دہانی کرائی بعد ازاں ہائی پاورڈ تحقیقاتی کمیٹی نے جائے وقوعہ کا دورہ بھی کیا حنا جاوید قتل کیس میں تفتیش کے تمام پہلوں کا ازسرنو جائزہ لیا جارہا ہے یاد رہے کہ حنا جاوید کو 20 اگست کو اسکے گھر میں تشدد کے بعد قتل کیا گیا تھا۔ مقتولہ کے بھائی کی مدعیت میں درج مقدمہ میں مقتولہ کے شوہر، سسر اور ان کے گھریلو ملازم کو نامزد کیا گیا ہے۔
