پاکستان سعودی عرب کے دفاع کیساتھ سفارتی کوششیں بھی جاری رکھے، سردار مسعود

اسلام آباد(آئی این پی)امریکہ، چین و اقوام متحدہ میں پاکستان کے سابق سفیر اور آزاد جموں و کشمیر کے سابق صدر
سردار مسعود خان نے کہا ہے کہ پاکستان کو مشرق وسطیٰ میں کشیدگی کم کرنے کے لیے سفارتی کوششیں جاری رکھنے کے ساتھ سعودی عرب کے دفاع سے متعلق اپنے عہد کی پاسداری بھی کرنی چاہیے۔ایک بین الاقوامی ٹیلی ویژن چینل کو انٹرویو دیتے ہوئے سردار مسعود خان نے کہا کہ پاکستان نے امریکہ اور ایران کے درمیان جنگ بندی کرانے، دونوں ممالک کے نمائندوں کو اسلام آباد میں مذاکرات کے لیے لانے اور مفاہمت کی یادداشت کی تیاری و دستخط میں سہولت فراہم کرکے ایک اہم ثالث کی حیثیت سے اپنی صلاحیتوں کا مظاہرہ کیا ہے۔ انہوں نے پاکستان کی سفارتی کوششوں کی حمایت پر علاقائی ممالک، چین، یورپی کونسل، کینیڈا اور آسٹریلیا کے کردار کو بھی سراہا۔سعودی عرب اور حوثیوں کے درمیان بگڑتی ہوئی صورتحال کا ذکر کرتے ہوئے انہوں نے کہا کہ پاکستان کی دوہری ذمہ داری ہے کہ وہ کشیدگی میں اضافے کو روکنے کے لیے سفارت کاری کو فروغ دے اور سعودی عرب کے دفاع کی حمایت بھی کرے۔ انہوں نے پاکستان، سعودی عرب اور ترکیہ کے درمیان طے پانے والے مکہ دفاعی اتحاد کا حوالہ دیتے ہوئے کہا کہ اس کے تحت سعودی عرب پر حملے کی صورت میں مملکت کی دفاعی کوششوں کی حمایت پاکستان کی ذمہ داری ہے۔سردار مسعود خان نے تجویز دی کہ پاکستان، سعودی عرب اور حوثی فریق عمان میں امریکہ اور حوثیوں کے درمیان طے پانے والی مفاہمت کی طرز پر کسی انتظام پر غور کریں، جس کا مقصد 2025 کی جنگ بندی برقرار رکھنا اور ایک دوسرے کے خلاف حملوں کی روک تھام ہو۔ انہوں نے کہا کہ یمن کی صورتحال داخلی تقسیم اور مختلف فریقوں کے علاقائی دعوؤں کے باعث پیچیدہ ہے۔ پاکستان حوثیوں کے حملوں کی مذمت کر چکا ہے، تاہم ثالثی کی کوششیں تاحال کوئی نمایاں نتیجہ نہیں دے سکیں، جبکہ پس پردہ رابطے جاری ہیں۔امریکہ اور ایران کے درمیان صورتحال پر بات کرتے ہوئے انہوں نے مذاکرات کے امکانات کو غیر یقینی قرار دیا۔ ان کے مطابق امریکی صدر ڈونلڈ ٹرمپ کے بیانات سے یہ ابہام پیدا ہوا ہے کہ آیا امریکہ میں وسط مدتی انتخابات سے قبل دوبارہ فوجی حملے شروع ہو سکتے ہیں یا نہیں۔ انہوں نے کہا کہ پاکستان، قطر اور روس سمیت ثالث ممالک سفارتی رابطے جاری رکھے ہوئے ہیں، تاہم زیر غور تجاویز کے باوجود اب تک کوئی خاطر خواہ پیش رفت نہیں ہو سکی۔سابق سفیر نے زور دیا کہ فوری ترجیح زیادہ سے زیادہ مطالبات پر اصرار کرنے کے بجائے عملی اور مرحلہ وار اقدامات کے ذریعے مذاکرات کی بحالی ہونی چاہیے۔ انہوں نے ایرانی صدر مسعود پزشکیان کا روسی صدر ولادیمیر پیوٹن کے ذریعے پہنچایا گیا پیغام کا حوالہ دیتے ہوئے کہا کہ مذاکرات کا آغاز آبنائے ہرمز سے متعلق انتظامات اور امریکی بحری ناکہ بندی ختم کرنے جیسے معاملات سے کیا جا سکتا ہے، جس کے بعد جوہری مسئلے پر بات آگے بڑھائی جا سکتی ہے۔سردار مسعود خان نے خبردار کیا کہ موجودہ غیر یقینی صورتحال خطے میں مزید کشیدگی کا خطرہ بڑھا رہی ہے، اس لیے سفارتی رابطوں کو ہر صورت برقرار رکھنا ضروری ہے۔انہوں نے کہا کہ مشکل حالات کے باوجود مذاکرات کی بحالی کی امید موجود ہے۔ پاکستان مزید تصادم کی روکنے، علاقائی استحکام کے تحفظ اور تنازعات کے پُرامن حل کے لیے سفارتی اقدامات کی حمایت جاری رکھے گا۔