نیویارک میں لاہور لٹریری فیسٹیول، ممتاز ادیبوں، دانشوروں’ فنکاروں کی شرکت

واشنگٹن (بیورو چیف)امریکہ میں پاکستان کے سفیر رضوان سعید شیخ نے کہا ہے کہ لاہور محض ایک
تاریخی شہر نہیں بلکہ پاکستان کی تہذیبی عظمت، ادبی روایات، فکری ارتقا اور ثقافتی شناخت کا ایک روشن استعارہ ہے۔ لاہور نے برصغیر کی تاریخ، ادب، سیاست، فنونِ لطیفہ اور فکری تحریکوں کی تشکیل میں غیر معمولی کردار ادا کیا ہے، جبکہ اس شہر کی صدیوں پر محیط تہذیبی روایات پاکستان کی قومی شناخت کا ناقابلِ فراموش حصہ ہیں۔پاکستانی سفیر نے ان خیالات کا اظہار نیویارک میں ایشیا سوسائٹی کے زیرِ اہتمام منعقدہ لاہور لٹریری فیسٹیول میں شرکت کے موقع پر کیا، جہاں ممتاز ادیبوں، دانشوروں، فنکاروں اور مختلف شعبہ ہائے زندگی سے تعلق رکھنے والی شخصیات نے شرکت کی۔لاہور کے شاندار تاریخی، ثقافتی اور ادبی ورثے کو خراجِ تحسین پیش کرتے ہوئے کہا کہ لاہور ہمیشہ سے تخلیقی صلاحیتوں، علمی سرگرمیوں اور فکری مکالمے کا مرکز رہا ہے۔ اس شہر نے پاکستان میں ادب، فلم، موسیقی اور فنونِ لطیفہ کے فروغ میں نمایاں کردار ادا کیا اور مختلف ادوار میں قومی فکر اور ثقافتی شعور کی تشکیل میں اہم خدمات انجام دیں۔انہوں نے تاریخی قراردادِ لاہور کا خصوصی حوالہ دیتے ہوئے کہا کہ یہ قرارداد سیاسی ادب کا ایک ایسا لازوال شاہکار ہے جس نے عملی حقیقت اختیار کرتے ہوئے پاکستان کے قیام کی فکری اساس فراہم کی۔ ان کے مطابق لاہور کی تاریخی اہمیت محض ماضی کے واقعات تک محدود نہیں بلکہ اس شہر کی تہذیبی اور فکری روایات آج بھی پاکستان کی اجتماعی شناخت میں نمایاں حیثیت رکھتی ہیں۔پاکستانی سفیر نے لاہور اور نیویارک کی ثقافتی اہمیت کا تقابلی جائزہ پیش کرتے ہوئے کہا کہ امریکہ میں نیویارک کو جو مقام ثقافت، ادب، فنون اور فکری سرگرمیوں کے حوالے سے حاصل ہے، پاکستان میں لاہور بھی اسی نوعیت کی منفرد حیثیت رکھتا ہے۔انہوں نے کہا کہ لاہور کی ثقافتی رنگا رنگی، تاریخی عظمت اور ادبی روایات اسے پاکستان کے دیگر شہروں میں ممتاز مقام عطا کرتی ہیں۔ یہ شہر مختلف تہذیبی اثرات اور فکری رجحانات کے امتزاج کی ایک شاندار مثال ہے۔نیویارک میں لاہور لٹریری فیسٹیول کے انعقاد کو پاکستان کے ادبی اور ثقافتی تشخص کو بین الاقوامی سطح پر اجاگر کرنے کی ایک اہم کوشش قرار دیا گیا۔ اس نوعیت کے اجتماعات مختلف ممالک کے ادیبوں، دانشوروں اور فنکاروں کے درمیان مکالمے، باہمی افہام و تفہیم اور ثقافتی روابط کے فروغ کے لیے موثر پلیٹ فارم فراہم کرتے ہیں۔فیسٹیول میں پاکستان کے ادبی ورثے، ثقافتی تنوع اور تخلیقی روایات کو عالمی سامعین کے سامنے پیش کرنے کا موقع بھی میسر آیا، جس سے پاکستانی ادب اور ثقافت کی بین الاقوامی سطح پر پذیرائی کے امکانات کو تقویت ملتی ہے۔