نوٹسز بے سود3 ہزار سے زائد شاپنگ مالز بڑی عمارتیں فائر سیفٹی انتظامات سے محروم

ملتان (سٹی رپورٹر) پنجاب بھر کے بڑے شہروں میں فائر سیفٹی انتظامات مکمل نہ کرنے والے شاپنگ پلازوں اور عمارتوں کے مالکان کے خلاف کارروائی کی ہدایت کردی گئی ۔ صوبے کے مختلف شہروں میں واقع 3 ہزار سے زائد شاپنگ مالز اور بڑی عمارتوں کو نوٹس دیئے جانے کے باوجود فائر سیفٹی انتظامات نہ ہوسکے۔ میونسپل کارپوریشنز ،ریسکیو 1122، سول ڈیفنس ،ڈویلپمنٹ اتھارٹیز کو کارروائی کے اختیارات دئیے گئے ہیں ۔ذرائع کے مطابق حکومت پنجاب کی جانب سے چند ماہ قبل لاہور، ملتان، فیصل آباد، راولپنڈی سمیت دیگر بڑے شہروں کے شاپنگ مالز، کمرشل پلازوں اور بڑی عمارتوں جن میں پرائیویٹ ہسپتال ،سکولز، کالجز اور دیگر عمارتوں میں فائر سیفٹی انتظامات کو یقینی بنانے کی ہدایت کی گئی ،تاہم پنجاب کے بڑے شہروں جن میں لاہور ،فیصل آباد، ملتان ،راولپنڈی سمیت دیگر شہروں کے متعلقہ اداروں کی رپورٹ کے مطابق پنجاب کے بڑے شہروں میں واقع تین ہزار سے زائد بڑے شاپنگ مالز اور بڑی عمارتوں میں فائر سیفٹی انتظامات مکمل نہیں کیے جاسکے ہیں ۔ملتان شہر کے 500 سے زائد شاپنگ مالز، کمرشل پلازوں، پرائیویٹ ہسپتالوں، تعلیمی اداروں کی عمارتوں میںنہ صرف فائر سیفٹی انتظامات نہیں ہیں بلکہ آتشزدگی کی صورت میں ایمرجنسی باہر نکلنے کے لیے راستے بھی نہیں ہیں ۔ایم ڈی اے ملتان، میونسپل کارپوریشن ملتان، ریسکیو 1122، سول ڈیفنس پر مشتمل ٹیموں کی جانب سے 1359 عمارتوں کے مالکان کو نوٹس جاری کیے گئے، تاہم 500 سے زائد عمارتوں کے مالکان کی جانب سے تاحال انتظامات نہیں کیے گئے ۔ملتان کے بڑے شاپنگ مالز میں بوسن روڈ پر واقع کرسٹل مال، کے کے مارٹ، یونائیٹڈ مال، پیس اینڈ پیس ،سٹی پلازہ سمیت پرائیویٹ تعلیمی اداروں ہسپتالوں کی عمارتیں شامل ہیں۔ صوبائی حکومت کی جانب سے رپورٹ پیش کیے جانے کے بعد میونسپل کارپوریشنز ڈویلپمنٹ اتھارٹیز کو ہدایت کی گئی ہے کہ فائر سیفٹی انتظامات نہ کرنے پر عمارتوں کو سیل کرنے کی ہدایت کی گئی ہے جس پر ایم ڈی اے شعبہ ٹاؤن پلاننگ نے شہر کے 30 بڑے شاپنگ مالز کو حتمی نوٹس دیئے گئے ہیں۔
فائر سیفٹی