پبلک ٹرانسپورٹ گاڑیوں میں سر عام غیر قانونی ایل پی جی گیس بھرنے کا سلسلہ جاری

راولپنڈی (عرفان چوہان سے)ریجنل ٹرانسپورٹ اتھارٹی راولپنڈی کے اہلکاروں کی مبینہ غفلت اور لاپرواہی کے باعث مصریال روڈ ڈھوک سیداں روڈ چچکری روڈ، اڈیالہ روڈ، لوے روڈ اور آئی جے پی روڈ راولپنڈی کیرج فیکٹری پل کے ساتھ پبلک ٹرانسپورٹ گاڑیوں میں سرعام غیرقانونی طور پر ایل پی جی گیس بھرنے کا سلسلہ جاری ہے، جس سے مسافروں اور شہریوں کی زندگیاں خطرے میں پڑ گئی ہیں۔ متعلقہ اداروں کی مبینہ غفلت کے باعث حساس نوعیت کا یہ غیرقانونی کام ٹریفک پولیس اور ریجنل ٹرانسپورٹ اتھارٹی کے اہلکاروں کی ناک کے نیچے کھلے عام جاری ہے، مگر اس کے تدارک کے لیے مثر کارروائی سامنے نہیں آ سکی۔تفصیلات کے مطابق راولپنڈی کے مختلف علاقوں مصریال روڈ، ڈھوک سیداں روڈ، چکری روڈ، اڈیالہ روڈ، لوے روڈ ،آئی جے پی روڈ راولپنڈی کیرج فیکٹری پل کے ساتھ پبلک ٹرانسپورٹ میں ایل پی جی گیس بھرنے کا غیرقانونی عمل جاری رہنے پر شہریوں اور مسافروں میں تشویش پائی جاتی ہے۔ شہریوں کا کہنا ہے کہ حکومت نے ایل پی جی سلنڈر والی گاڑیاں بند کی ہوئی ہیں لیکن اس کے باوجود مسافر گاڑیوں میں غیر قانونی گیس بھرنا کسی بھی وقت بڑے حادثے کا سبب بن سکتا ہے۔ذرائع کے مطابق بعض گاڑیوں میں مبینہ طور پر چار چار ایل پی جی سلنڈر کی فٹنگ کروائی ہوئی ہے اور ایل پی جی گیس آتش گیر ہونے کے باعث گیس بھرائی کے دوران معمولی سی غفلت بھی آگ لگنے یا دھماکے کا باعث بن سکتی ہے، اور شہریوں کی جانیں بھی خطرے میں پڑ سکتی ہیں۔ان مقامات پر یہ عمل کھلے عام جاری ہے تو سوال یہ پیدا ہوتا ہے کہ روٹ پرمٹ، گاڑیوں کی فٹنس اور مسافروں کی حفاظت کے ذمہ دار اداروں کی جانب سے نگرانی کیوں نہیں کی جا رہی؟ایک طرف ایل پی جی سلنڈروں اور پبلک ٹرانسپورٹ گاڑیوں کے خلاف متعلقہ اداروں کی جانب سے کریک ڈان کیا جا رہا ہے تو دوسری طرف یہ غیر قانونی کام جاری ہے۔جسکی وجہ سے کسی بھی وقت قیمتی انسانی جانوں کا نقصان ہو سکتا ہے۔شہریوں کا مطالبہ ہے کہ ریجنل ٹرانسپورٹ اتھارٹی راولپنڈی، ٹریفک پولیس اور جڑواں شہروں کے دیگر متعلقہ ادارے فوری نوٹس لیتے ہوئے کیرج فیکٹری پل اور دیگر علاقوں سمیت ایسے تمام مقامات پر کارروائی کریں جہاں مسافر گاڑیوں میں غیرقانونی طور پر ایل پی جی بھری جا رہی ہے اور اس غیرقانونی گیس بھرائی میں ملوث افراد کے خلاف قانون کے مطابق کارروائی کی جائے اور ذمہ دار اہلکاروں کی بھی انکوائری کی جائے، تاکہ کسی بڑے حادثے سے پہلے اس خطرناک عمل کو روکا جا سکے۔