چکوال(بیور و رپورٹ)برٹش ہائی کمشنر مس جین میریٹ نے چوہدری ارتضیٰ حیدر کی دعوت پر ڈپٹی کمشنر چکوال سارہ حیات کے ہمراہ موضع مرید کا دورہ کیا، جہاں انہوں نے علاقائی ثقافت اور روایتی کھیلوں کے فروغ کے حوالے سے منعقدہ تقریب میں شرکت کی۔ تقریب کا اہتمام چوہدری شاہزیب بانگا آف مرید کی روایتی ثقافتی کھیل ‘چھٹ’ کے وزن اٹھانے کے مقابلے میں نمایاں کامیابی کے اعتراف میں کیا گیا تھا۔ برٹش ہائی کمشنر جین میریٹ نے چوہدری شاہزیب بانگا کو کامیابی پر حوصلہ افزائی کرتے ہوئے مبارکباد دی۔ اس موقع پر سید جواد الحسن کاظمی، جنرل سیکرٹری سنی اتحاد کونسل پاکستان سمیت معززینِ علاقہ اور دیگر شخصیات بھی موجود تھیں۔ اس موقع پر برٹش ہائی کمشنر مس جین میریٹ نے چوہدری شاہزیب بانگا کی کامیابی کو سراہتے ہوئے کہا کہ علاقائی ثقافت اور روایتی کھیل کسی بھی معاشرے کی شناخت اور تاریخی ورثے کا اہم حصہ ہوتے ہیں۔ ایسے کھیل مقامی روایات کو زندہ رکھنے کے ساتھ ساتھ نئی نسل کو اپنی ثقافتی پہچان سے روشناس کرانے میں بھی اہم کردار ادا کرتے ہیں۔ انہوں نے کہا کہ روایتی کھیلوں میں نمایاں کارکردگی دکھانے والے افراد کی حوصلہ افزائی قابلِ قدر عمل ہے، کیونکہ اس سے نوجوانوں میں محنت، لگن اور صحت مندانہ مقابلے کا جذبہ پروان چڑھتا ہے۔ ڈپٹی کمشنر سارہ حیات نے اس موقع پر کہا کہ ضلع چکوال اپنی منفرد ثقافت، تاریخی روایات اور روایتی کھیلوں کے حوالے سے ایک نمایاں شناخت رکھتا ہے۔ مقامی ثقافتی سرگرمیاں ہمارے معاشرتی ورثے کی عکاس ہیں، جن کا تحفظ اور فروغ اجتماعی ذمہ داری ہے۔ انہوں نے کہا کہ چوہدری شاہزیب بانگا کی کامیابی ضلع چکوال کے لیے باعثِ مسرت ہے اور ایسے باصلاحیت افراد کی حوصلہ افزائی سے نوجوانوں کو اپنی صلاحیتیں منوانے اور مثبت سرگرمیوں میں حصہ لینے کا موقع ملتا ہے۔ ڈپٹی کمشنر نے مزید کہا کہ علاقائی ثقافت اور روایتی کھیلوں کو فروغ دینے کے لیے منعقدہ تقریبات نہ صرف ہماری ثقافتی شناخت کو اجاگر کرتی ہیں بلکہ معاشرے میں باہمی ہم آہنگی، میل جول اور مثبت سماجی اقدار کو بھی تقویت دیتی ہیں۔ انہوں نے اس امر کی اہمیت پر زور دیا کہ مقامی روایات اور ثقافتی ورثے کو محفوظ رکھنے کے لیے ایسی سرگرمیوں کی حوصلہ افزائی جاری رکھی جائے
