کراچی میں چکی کا آٹا200 روپے کلو فروخت ہونے لگا

کراچی (بزنس رپورٹر) آٹے کی قیمتوں میں اضافے نے شہریوں کی مشکلات بڑھا دی ہیں، شہر میں چکی کا آٹا سرکاری نرخ 145 روپے فی کلو کے بجائے 200 روپے میں فروخت ہونے لگا، جبکہ فائن آٹے کی قیمت بھی بڑھ کر 176 روپے فی کلو ہوگئی ہے۔ روٹی کی قیمت 30 سے 35 روپے تک پہنچ گئی ہے۔ کمشنر کراچی کے جاری کردہ نرخ نامے کے مطابق چکی کے آٹے کی سرکاری قیمت 145 روپے فی کلو مقرر ہے، تاہم بازار میں یہ 200 روپے فی کلو فروخت ہو رہا ہے، جس کے باعث شہریوں کو فی کلو 55 روپے اضافی ادا کرنا پڑ رہے ہیں۔ اسی طرح ہول سیل مارکیٹ میں فائن آٹے کی مقررہ قیمت 132 روپے فی کلو ہے، لیکن یہ 176 روپے فی کلو فروخت کیا جا رہا ہے۔ راشن والا آٹا ہول سیل مارکیٹ میں 161 روپے جبکہ پرچون بازار میں 168 روپے فی کلو دستیاب ہے۔ آٹے کی قیمتوں میں اضافے کے ساتھ روٹی بھی مہنگی ہوگئی ہے اور مختلف مقامات پر 30 سے 35 روپے میں فروخت ہو رہی ہے۔ کلو آٹے کے تھیلے کی قیمت 1400 روپے سے بڑھ کر 1600 روپے تک جا پہنچی ہے۔