سپرال نینو 2026 اور 2027 میں گرمی کے نئے ریکارڈ ماہرین نےخطرے کی گھنٹی بجا دی

برسلز(نیوز ایجنسیاں)بحرالکاہل میں سمندر کی سطح کا درجہ حرارت ریکارڈ 29.70ڈگری سینٹی گریڈ تک پہنچ گیا، موسمیاتی ماہرین نے خبردار کیا ہے کہ ال نینو اور انسانی سرگرمیوں سے پیدا ہونے والی موسمیاتی تبدیلی مل کر عالمی درجہ حرارت میں مزید اضافہ کرسکتی ہیں۔ موسمیاتی رجحان ال نینو کی شدت میں اضافے کے باعث 2026دنیا کا گرم ترین سال بن سکتا ہے، جبکہ ماہرین نے 2027میں بھی گرمی کے نئے عالمی ریکارڈ کا خدشہ ظاہر کیا ہے۔عالمی خبر رساں ادارے کے مطابق یورپی یونین کی موسمیاتی نگرانی کی سروس کوپرنیکس نے بتایا ہے کہ بحرالکاہل کے اہم حصے نینو 3.4میں ستمبر کے دوران سمندر کی سطح کا درجہ حرارت ریکارڈ 29.70ڈگری سینٹی گریڈ تک پہنچ گیا۔ یہ سطح 1982-83، 1997-98اور 2015-16کے طاقتور ال نینو ادوار میں ریکارڈ کی گئی بلند ترین سطحوں سے بھی زیادہ ہے۔کوپرنیکس کے ڈائریکٹر کارلو بونتیمپو نے نیوز ایجنسی کو بتایا کہ رواں سال جون میں سامنے آنے والا ال نینو غیر معمولی نوعیت کا ہے، تاہم فی الحال یہ کہنا قبل از وقت ہوگا کہ یہ تاریخ کا سب سے طاقتور ال نینو ہے۔ان کے مطابق موسمیاتی تبدیلی کے باعث سمندروں کا درجہ حرارت پہلے ہی بڑھ رہا ہے، جس سے موجودہ ال نینو کا ماضی کے واقعات سے موازنہ پیچیدہ ہوجاتا ہے۔ یہ دنیا کے مختلف علاقوں میں موسم کے معمولات تبدیل کرسکتا ہے، جس سے بعض مقامات پر خشک سالی اور کہیں شدید بارشوں اور سیلاب کا خطرہ بڑھ جاتا ہے۔ یہ رجحان انسانی سرگرمیوں کے باعث ہونے والی عالمی حدت کے اثرات کو بھی مزید بڑھا سکتا ہے۔کوپرنیکس کے مطابق ستمبر میں دنیا بھر میں سمندر کی سطح کا اوسط درجہ حرارت 21.05 ڈگری سینٹی گریڈ ریکارڈ کیا گیا، جو اسی مہینے کے لیے 2023 کے سابقہ ریکارڈ 20.92 ڈگری سے زیادہ ہے۔اسی طرح اگست میں ریکارڈ گرمی کے بعد ستمبر دنیا کا اب تک کا دوسرا گرم ترین ستمبر رہا، جب سطح زمین کے قریب ہوا کا اوسط درجہ حرارت 16.27 ڈگری سینٹی گریڈ ریکارڈ کیا گیا۔ماہرین کے مطابق ال نینو کا اثر اکثر اس کے عروج کے بعد اگلے سال عالمی درجہ حرارت میں زیادہ واضح ہوتا ہے، کیونکہ بحرالکاہل میں جمع ہونے والی حرارت فضا میں منتقل ہوتی ہے۔ یہ رجحان عموما ہر دو سے سات سال بعد سامنے آتا ہے اور تقریبا 9 سے 12 ماہ تک برقرار رہ سکتا ہے۔کارلو بونتیمپو کا کہنا ہے کہ ماضی کے رجحانات کو دیکھتے ہوئے ممکن ہے کہ 2026 کے بعد 2027 بھی گرمی کے نئے عالمی ریکارڈ قائم کرے۔ تاہم حتمی صورتحال کا انحصار ال نینو کی آئندہ شدت اور دیگر موسمیاتی عوامل پر ہوگا۔ماہرین نے خبردار کیا ہے کہ ال نینو اور انسانی سرگرمیوں سے پیدا ہونے والی موسمیاتی تبدیلی کا امتزاج دنیا کے مختلف حصوں میں شدید گرمی، خشک سالی اور سیلاب جیسے خطرات میں اضافہ کرسکتا ہے۔
ال نینو