کراچی میں مختلف مقامات پر پولیس مقابلے،8زخمیوں سمیت 12 ملزمان گرفتار

کراچی (این این آئی) شہر کے مختلف علاقوں میں پولیس نے مبینہ مقابلوں اور کارروائیوں کے دوران 8 زخمیوں سمیت 12 ملزمان کو گرفتار کرلیا۔پولیس کے مطابق گرفتار ملزمان کے قبضے سے غیر قانونی اسلحہ، گولیاں، موٹر سائیکل، چھینے گئے موبائل فون، نقدی اور دیگر سامان برآمد ہوا ہے جبکہ فرار ہونے والے ملزمان کی تلاش جاری ہے۔ پولیس کے مطابق اورنگی ٹاؤن کے علاقے اقبال مارکیٹ کے قریب مبینہ مقابلے میں ایک زخمی سمیت 3 ملزمان کو گرفتار کیا گیا۔ ملزمان کے قبضے سے اسلحہ اور چھینا گیا سامان برآمد ہوا۔ اسی علاقے میں پیرا آباد کے قریب پولیس نے ایک ملزم کو زخمی حالت میں گرفتار کرکے اس کے قبضے سے اسلحہ برآمد کرلیا۔ جیل چورنگی پل کے قریب پولیس مقابلے میں ایک زخمی سمیت 3 ملزمان گرفتار کیے گئے۔ گرفتار ملزمان کی شناخت فیاض، اسلم اور امیر حمزہ کے نام سے ہوئی ہے۔